Þyngd forpakkaðra kjötvara var oft ekki í samræmi við merkingu. mbl.is/Þorkell

Neytendastofa ætlar að beita skipulegum úrtaksskoðunum og könnunum til þess að bæta eftirlit með hvort þyngd forpakkaðrar unninnar kjötvöru sé í samræmi við merkingu. Álegg reyndist nokkuð léttara enn upp var gefið á pökkum í könnun Neytendastofu á dögunum.

Hjá þremur af fjórum íslenskum framleiðslufyrirtækjum, sem ekki nota svonefnt e-merki, voru frávik á raunmagni kjöts í umbúðunum meiri en leyfilegt er. Af 12 vörutegundum sem vigtaðar voru hjá þessum aðilum reyndust 6 vörutegundir eða 50% ekki standast kröfur.

„Hingað til hefur verið horft á tækin og löggildingu þeirra. Nú sjáum við að við þurfum að taka skref lengra og gera úrtakskannanir. Þó að tækin sem notuð eru séu rétt þarf að kanna hvort magnið sem fer í pakkningarnar sé það sem lofað er,“ segir Tryggvi Axelsson, forstjóri Neytendastofu.

Hann segir að stofnuninni hafi borist ábendingar og kvartanir og smám saman hafi því orðið tilefni til þess að hún beindi markvisst sjónum sínum að þessum þætti. Kjötborð í verslunum þar sem vara er vigtuð þar sem fólk sér til séu að hverfa. Því sé kastljósið að beinast að þeim hluta markaðarins þar sem forpökkun fer fram.

„Hefðbundið eftirlit með vogum í verslunum er þekkt og hefur verið hér lengi. Nú erum við að færa eftirlitið á gólf þeirra sem pakka og fylgjast með því að þetta sé rétt gert,“ segir Tryggvi.

Það sé líka mikilvægt fyrir fyrirtækin að rétt sé staðið að pökkuninni svo þau yfirpakki ekki. Hagur neytenda og fyrirtækja fari því saman í þessum efnum.

Álegg léttara en gefið var upp.