Samtökin InDefence afhentu breskri þingnefnd á sínum formleg mótmæli vegna hryðjuverkalaganna.

Þingmenn Framsóknarflokks og Hreyfingarinnar hafa lagt fram þingsályktunartillögu um málshöfðun á hendur breska ríkinu fyrir alþjóðlegum dómstól vegna beitingar hryðjuverkalaga gegn Landsbankanum haustið 2008. 

Um er að ræða endurflutning tillögu, sem flutt var á síðasta þingi en aldrei afgreidd úr utanríkismálanefnd.

Samkvæmt tillögunni verður forsætisráðherra, fyrir hönd íslenska ríkisins, falið að undirbúa málshöfðun á hendur breska ríkinu fyrir viðeigandi dómstól vegna beitingar hryðjuverkalaga gegn íslenska ríkinu og íslenskum fyrirtækjum.

Málssóknin verði í fyrsta lagi byggð á því að beiting hryðjuverkalaganna hafi verið tilefnislaus, ekki lögum samkvæmt og hafi skaðað íslenskt orðspor og fjárhagslega hagsmuni þjóðarinnar. Í öðru lagi verði gerð krafa um skaðabætur fyrir það tjón sem ákvörðun breskra stjórnvalda olli íslenska ríkinu og íslenskum fyrirtækjum.

Fram kom nýlega í skýrslu sem IFS greining gerði fyrir fjármálaráðuneytið um áhrif hryðjuverkalaganna að beint tjón íslenskra fyrirtækja hafi verið á bilinu tveir til níu milljarðar króna vegna þess að hryðjuverkalögunum var beitt og líklegasta gildið sé um 5,2 milljarðar.

Þá bendi flest til þess að óbeint tjón sé mun hærra og líklegt sé að laskað orðspor íslensks efnahagslífs og þar með íslenskra fyrirtækja hafi haft langmest tjón í för með sér.

Þingsályktunartillagan í heild