Verði af sameiningunni klífur Hrútafjörður sveitarfélagi ðað miklu leyti í tvennt. mbl.is

Viðræður um sameiningu Húnaþings vestra og Bæjarhrepps ganga vel og er stefnt að því að halda íbúakosningar um sameininguna laugardaginn 3. desember nk. Verði hún samþykkt verða sveitarfélögin sameinuð frá og með næstu áramótum.

Húnaþing vestra varð til með sameiningu sjö sveitarfélaga sem var samþykkt í íbúakosningum 1997. Með sameiningu við Bæjarhrepp bætast ríflega 510 ferkílómetrar við flatarmálið og 100 íbúar. Sameinað sveitarfélag yrði það tólfta stærsta á Íslandi, 3.015 ferkílómetrar, og íbúar ríflega 1.200. Sveitarfélögin eru hvorki í sama kjördæmi né í sama sýslumannsumdæmi en það hefur í sjálfu sér engin áhrif á hugsanlega sameiningu.

Í Morgunblaðinu í dag bendir Leó Örn Þorleifsson, oddviti Húnaþings vestra, á að mikil samvinna hafi verið milli sveitarfélaganna tveggja í gegnum tíðina. Samvinna hafi verið um brunavarnarmál, félagsþjónustu, bókhaldsmál og uppgjör og fleira slíkt. Þá hafa börn úr Bæjarhreppi, þ.e. þau sem eru í tveimur elstu árgöngum grunnskóla, sótt nám á Laugarbakka. Og þar sem þau sækja skóla þar taka þau um leið þátt í félagsstarfi og íþróttum. „Þetta eru hálfgerð systursamfélög. Þau eru byggð á sama meiði, landbúnaði, og margt mjög skylt milli þeirra,“ segir Leó Örn.