Kveikt var á Friðarsúlunni í Viðey á afmælisdegi Johns Lennons. mbl.is/Börkur

Yoko Ono, ekkja Johns Lennons, kveikti á Friðarsúlunni í Viðey í kvöld á afmælisdegi Lennons og sonar þeirra, Seans Lennons. Hann var staddur í Viðey með móður sinni í kvöld. Ono hvetur alla til að hugsa um frið á jörðu á þessum degi. 

Í tilkynningu kemur fram að tæplega 1.000 gestir hlustuðu á og sungu með í einu frægasta lagi Johns Lennons „Imagine” í kvöld úti í Viðey. Einnig fylgdust milljónir manna um víða veröld með athöfninni í beinni útsendingu á vefnum  www.imaginepeacetower.com.  

Kveikt verður á Friðarsúlunni frá  9. október til  8. desember sem er dánardagur Johns Lennons. „Þessi tími sem kveikt er á Friðarsúlunni er því táknmynd um stutt en magnað líf þessa einstaka listamanns. Einnig er kveikt á henni við ýmis önnur tilefni, nú síðast í lok ágúst til að minnast fórnarlamba voðaverkanna á Útey í Noregi," segir í tilkynningu.   

Yoko Ono sagði í kvöld: „Ég er himinlifandi að vinir mínir og fjölskylda skuli hafa séð sér fært að taka þátt í þessari athöfn hér til að fagna lífi og boðskap Johns Lennons. 9. október er ekki eingöngu afmælisdagur Johns heldur einnig sonar okkar Seans, svo dagurinn hefur djúpa tilfinningalega merkingu fyrir okkur. Á þessum degi hvet ég alla í heiminum til að hugsa sér frið á jörðu.“  

Yoko Ono Plastic Band, með Yoko, Sean og fleiri hljómsveitarmeðlimum spilar á Iceland Airwaves-hátíðinni í Hörpu hinn 13. október.  

Yoko Ono og Sean Lennon í Viðey í kvöld