Jörð er orðin hvít á Siglufirði. Myndin er tekin innan úr Héðinsfjarðargöngum. mbl.is/Sigurður Ægisson

Jörð er orðin hvít í Siglufirði og annars staðar utarlega á Tröllaskaga, s.s. norðan við Dalvík, í Ólafsfirði og í Héðinsfirði. Ísing mun myndast víða á vegum um landið norðan- og norðvestanvert þegar kólnar í dag.

Ísing verður einkum á fjallvegum, en líka í byggð, fyrst á Vestfjörðum og vestantil á Norðurlandi. Vindur er að snúast til N-áttar.  Krapi og síðar éljagangur verður á Vestfjörðum, en vestantil á Norðurlandi versnar veður með snjómuggu og síðar éljum, krapi til að byrja með í byggð.

Þetta á m.a. við um Holtavörðuheiði þar sem gert er ráð fyrir ofankomu og versnandi skyggni.  Vindur á fjallvegum allt að 10-15 m/s   Í Skagafirði og Eyjafirði er reiknað með nokkuð dimmri hríð og kófi um tíma síðdegis, en að það lagist síðan í kvöld. Frá þessu segir í tilkynningu frá Vegagerðinni.

Á Vestfjörðum eru hálkublettir í Ísafjarðardjúpi, hálka, hálkublettir og snjóþekja á fjallvegum Á Norðurlandi er hálka og éljagangur á  Þverárfjalli, Vatnsskarði og Öxnadalsheiði. Á Norðausturlandi er hálka á Hellisheiði eystri.