Jón Bjarnason, sjávarútvegs- og landbúnaðarráðherra en ekkert ráðuneyti stendur sig jafn illa í að skipa konur í nefndir. Ómar Óskarsson

Einungis 25% nefndarmanna í nefndum skipuðum af sjávarútvegs- og landbúnaðarráðuneytinu eru konur, samkvæmt nýrri skýrslu jafnréttisstofu um nefndir, ráð og stjórnir á vegum ráðuneytanna. Samkvæmt lögum er gert ráð fyrir að hlutur hvors kyns um sig skuli ekki vera minni en 40% nema að málefnalegar ástæður liggi að baki.

Heilbrigðisráðuneytið var með jafna þátttöku kynjanna (50%:50%) í nefndum á sínum vegum. Félags- og tryggingamálaráðuneytið var eina ráðuneytið með fleiri konur en karla í nefndum en hlutur kvenna var 51%.

Þrjú ráðuneyti voru með hlut kvenna í nefndum á bilinu 40%-49%. Það voru efnahags- og viðskiptaráðuneyti, iðnaðarráðuneyti og mennta- og menningarmálaráðuneyti. Í öðrum ráðuneytum var hlutur kvenna á bilinu 32%-39%, samkvæmt skýrslunni en frá árinu 2008 hafa verið í gildi lög um að jafna hlut kvenna og karla í nefndum á vegum hins opinbera.

Hlutfall kynjanna í öllum nefndum árið 2010 var 40% konur og 60% karlar. Hlutfall kynjanna í nýjum nefndum sem skipaðar voru á starfsárinu 2010 var 43% konur og 57% karlar.

Þegar kynjakvótinn var leiddur í lög 2008 voru 43% nefnda í samræmi við kynjakvótann. Árið 2010 voru 50% starfandi nefnda skipaðar í samræmi við 15. greinina. Árið 2010 voru skipaðar 164 nefndir. Af þeim voru 109 eða 66% í samræmi við 15. greinina.

„Ljóst er að áfram þarf að vinna markvisst að því að skipa konur og karla til jafns í nefndir, ráð og stjórnir á vegum ráðuneytanna. Jafnréttisstofa hefur unnið í samstarfi við ráðuneytisstjóra og jafnréttisfulltrúa ráðuneytanna að því að finna leiðir til jafna hlutfallið frekar en farið er yfir það í skýrslunni,“ segir í skýrslunni en hana má lesa hér.