Lögreglan mbl.is

Fólskuleg líkamsárás var framin á Sauðárkróki um helgina, þar sem maður sparkaði í höfuð annars manns sem lá í götunni. Að sögn lögreglunnar á Sauðárkróki hlaut sá sem ráðist var á alvarlega áverka og mátti litlu muna að illa færi.

Það var aðfaranótt laugardags sem lögreglunni barst tilkynning um líkamsárás utan við skemmtistað í bænum. Þegar lögregla kom á staðinn gáfu sig strax fram nokkur vitni sem lýstu því hvernig nafngreindur árásarmaður hefði sparkað í höfuð manns sem lá á götunni. Að sögn lögreglu virðist sem árásin hafi verið með öllu tilefnislaus. Aðstæður litu mjög illa út á vettvangi, mikið blæddi úr andliti mannsins sem lá vankaður á götunni en þó með meðvitund. 

Eftir að hlúð hafði verið að manninum og hann sendur með sjúkrabíl á Heilbrigðisstofnunina á Sauðárkróki var ábendingum vitna fylgt að árásarmanninum, hann handtekinn og vistaður í fangageymslu í nóttina. Skýrslur hafa nú verið teknar af bæði vitnum og hinum grunaða og miðar rannsókn málsins vel að sögn lögreglu, sem naut aðstoðar rannsóknardeildar lögreglunnar á Akureyri vegna alvarleika málsins.

Sá sem fyrir árásinni varð var á laugardag fluttur á sjúkrahúsið á Akureyri þar sem hann gekkst undir nánari skoðun og reyndist vera með fjölmarga áverka bæði í andliti og hálsi. Mjög litlu munaði að hann hlyti varanlegan skaða af, en betur fór en á horfðist og hefur hann nú verið útskrifaður.