Búist er við stormi og hvössum vindhviðum við fjöll suðvestan- og vestanlands fram yfir hádegi. Vaxandi suðaustanátt, 15-23 m/s og rigning sunnan- og vestanlands með morgninum en mun hægari og úrkomulaust fram eftir degi norðaustan til.

Sunnan 10-18 í kvöld og úrkomuminna. Víða frost norðanlands í fyrstu en hiti á landinu 4 til 10 stig síðdegis.

Á höfuðborgarsvæðinu verður vaxandi austlæg átt. Suðaustan 13-20 og rigning með morgninum en 8-15 síðdegis og úrkomuminna. Hiti 6 til 10 stig.

Um 850 km suðvestur af Reykjanes er 986 mb lægð sem þokast norður. Skammt austur af Íslandi er 1018 mb hæðarhryggur sem þokast í suðaustur.

Á morgun, fimmtudag, er útlit fyrir 13-20 sekúndumetra sunnanátt og rigningu, en úrkomulítið norðaustantil. Dregur úr úrkomu vestan til er líður á og lægir heldur. Hiti 8 til 14 stig.

Klukkan þrjú í nótt var austlæg eða breytileg átt, yfirleitt 3-8 en hvassast voru 15 m/s á Skrauthólum á Kjalarnesi og 16 á Stórhöfða. Léttskýjað norðanlands en farið að þykkna upp sunnanlands og skúrir allra syðst. Kaldast var 8 gráðu frost á Brú á Jökuldal en hlýjast 8 stiga hiti í Vestmannaeyjum.