Gamla hegningarhúsið Brynjar Gauti

„Það segir fátt af einum,“ segir Sigurður Torfi Guðmundsson, varaformaður Fangavarðarfélags Íslands en fangaverðir hér á landi eru ósáttir við að félagsmenn þeirra séu einir á vakt og gera skýlausa kröfu um að slíkum vöktum verði hætt. Samtök norrænna fangavarða hafa krafist þess að einsmanns vaktir í norrænum fangelsum verði aflagðar í kjölfar þess að 25 ára gamall kvenfangavörður í sænsku fangelsi var barinn til bana á meðan hún var ein á vakt.

Mikið skorið niður og vantar fjármagn

Páll Winkel, fangelsismálastjóri segir að í tveimur fangelsum á Íslandi sé einn fangavörður á vakt á næturnar. Annars vegar á Kvíabryggju og hins vegar í fangelsinu á Akureyri en það fangelsi er staðsett inni á lögreglustöð þar sem einnig eru lögreglumann á vakt. segir fangaverði með réttu hafa gert athugasemdir við að aðeins sé einn maður á næturvaktinni á Kvíabryggju. Páll tekur fram að þar séu vistaðir fyrirmyndarfangar en stofnuninni hafa verið gert að skera verulega niður og stærsti rekstrarliðurinn sé launakostnaður. Hann telji um 75% af útgjöldum og því erfitt að bæta við fangavörðum vegna niðurskurðar þó vilji væri fyrir hendi.

Ólíðandi að vera einn á vakt

Sigurður segir ekki öllu skipta þó fangelsið á Akureyri sé á lögreglustöðinni. „Lögreglan er stundum úti að sinna sínum störfum og þá eru menn bara einir. Þá er kannski enginn í húsi nema þessi eini maður og hann sér um fangageymslurnar líka og þarf að hleypa mönnum á klósett.“Hann segir þetta ólíðandi og öryggissjónarmið ekki í lagi. Vandamálið sé að það vanti meira fjármagn í fangelsisgeirann. Verið sé að spara peninga með því að hafa einn á vakt en það gangi ekki enda segi fátt af einum.