Sjúkrastofnanir sem Landspítalinn hefur lokað. mbl.is

Landspítalinn hefur á síðustu 10 árum tekið ákvörðun um að loka fimm sjúkrastofnunum, þ.e. Gunnarsholti, Arnarholti, Vífilsstöðum, réttargeðdeildinni á Sogni og St. Jósefsspítala. Spítalinn hefur skilað eða ætlar að skila þessu húsnæði til Fasteigna ríkisins.

Á Gunnarsholti var rekið vistheimili fyrir vímuefnasjúklinga, en því var lokað og hefur hluti húsnæðisins verið rifinn enda var það orðið lélegt. Á Arnarholti var rekin deild fyrir sjúklinga sem voru flestir haldnir af langt gengnum geðsjúkdómum, geðklofa eða þunglyndi eða bjuggu við andlega fötlun af öðrum ástæðum.

Landspítalinn var með starfsemi á Vífilsstöðum til 2002, en fram á síðasta ár rak Hrafnista þar öldrunardeild.

Landspítali áformar að loka síðustu deildinni á St. Jósefsspítala 1. desember. Landspítalinn ætlar að flytja réttargeðdeildina að Kleppi og skila húsnæðinu á Sogni til Fasteigna ríkissjóðs.

Ingólfur Þórisson, framkvæmdastjóri rekstrarsviðs Landspítala, segir að gera þurfi breytingar á húsnæðinu á Kleppi.