Málþing í þágu friðar fer nú fram í Hörpunni. Fremst á myndinni má sjá aðalfyrirlesarann, dr. Rebeccu Johnson. mbl.is/Kristinn

Í tilefni af því að 25 ár eru liðin frá leiðtogafundinum í Höfða er nú opið málþing, undir yfirskriftinni „Málþing í þágu friðar“, á vegum Reykjavíkurborgar í Hörpunni. Meðal frummælenda eru Jón Gnarr borgarstjóri og Frú Vigdís Finnbogadóttir, fyrrverandi forseti Íslands.

Vegna tímamótanna hefur Reykjavíkurborg efnt til ýmissa viðburða þar sem sérstök áhersla er lögð á hlutverk friðarhreyfinga, friðarrannsókna og afvopnunarmála í samtímanum og í sögulegu samhengi og er málþingið liður í þeirri dagskrá.
 
Aðalfyrirlesarinn er dr. Rebecca Johnson sem er virtur fræðimaður og eftirsóttur alþjóðlegur ráðgjafi á sviði vopnaeftirlits, afvopnunar og friðarrannsókna. Hún veitir ráðgjafa- og rannsóknarstofnununni Acronym Institute for Disarmament Diplomacy forstöðu og vinnur einnig í sjálfboðastarfi fyrir frjáls félagasamtök sem berjast fyrir útrýmingu kjarnorkuvopna og réttindum kvenna. Aðrir frummælendur eru m.a. Jón Gnarr og Vigdís Finnbogadóttir.

Í lok málþingsins verða pallborðsumræður sem Hjálmar Sveinsson, varaborgarfulltrúi stýrir. Þátttakendur í pallborði eru: Stefán Pálsson sagnfræðingur, formaður Samtaka hernaðarandstæðinga og stjórnmálaskýrandi, Alyson Bailes, aðjunkt við stjórnmálafræðideild Háskóla Íslands, Auður H. Ingólfsdóttir, lektor við Háskólann á Bifröst, og Khaled Mansour, sérfræðingur hjá Palestínuflóttamannaaðstoð Sameinuðu þjóðanna og nemandi við Alþjóðlegan jafnréttisskóla við HÍ.

Málþingið fer fram í sal í Hörpunni sem nefnist Ríma og hófst kl. 13.00.