mbl.is/Árni Torfason

Sjálfsbjörg segja að stjórnvöld ætli sér að spara hækkun örorkubóta með því að breyta forsendum fyrir útreikningi á aldurstengdri örorkuuppbót. Sparnaðurinn sé 200 milljónir vegna næsta árs.

Í ályktun frá Sjálfsbjörgu segir að í umræðu um fjárlagafrumvarpið hafi fjármálaráðherra barið sér á brjóst og tali um að bætur almannatrygginga hækki mjög mikið á árinu 2011, en Sjálfsbjörg bendir á að hækkun bótanna sé einungis í samræmi við hækkun launa í kjarasamningum frá því fyrr á árinu.  „Fljótt á litið virðast örorkulaun eiga að hækka í samræmi við hækkun samkvæmt kjarasamningum á næsta ári.  Þegar betur er að gáð er þó gert ráð fyrir að spara 200 milljónir króna „með því að breyta forsendum fyrir útreikningi á aldurstengdri örorkuuppbót“ eins og segir í greinargerð með frumvarpinu.

Sjálfsbjörg hefur bent á, síðast í ályktun frá því í apríl sl. að gera þurfi stórátak í hækkun örorkulauna.  Var þar ma. vísað í yfirlýsingar velferðarráðherra um að „algerlega óhjákvæmilegt væri að hækka bæturnar“. Vísað er í mat Öryrkjabandalags Íslands um að ástandið sé skelfilegt hjá alltof stórum hópi öryrkja.  Sjálfsbjörg leggur áherslu á að ekki einungis sé mikilvægt að hækka örorkulaunin heldur að full viðurkenning fáist á þeim aukakostnaði sem fólk með hreyfihömlun og öryrkjar almennt verða fyrir, svo sem hjálpartækja- og lyfjakostnaði,“ segir í frétt frá Sjálfsbjörgu.

„Aldraðir og öryrkjar voru látnir taka á sig miklar byrðar eftir hrunið 2008.  Það er skýlaus krafa Sjálfsbjargar landssambands fatlaðra að nú þegar landið fer að rísa þá verði öldruðum og öryrkjum þessa lands greidd mannsæmandi lífeyrislaun.“