Tölvugerð mynd sem sýnir álverið sem Alcoa hugðist reisa á Bakka við Húsavík

Síðdegis í gær var kynnt á Húsavík sú ákvörðun Alcoa að hætta við áform fyrirtækisins um að reisa álver á Bakka, sem hefði 250 þúsund tonna framleiðslugetu á ári. Tómas Már Sigurðsson, forstjóri Alcoa á Íslandi, segir þetta mikil vonbrigði, en þessi ákvörðun hafi verið óhjákvæmileg í ljósi þess að útséð hafi verið um að tækist að útvega nýju álveri Alcoa næga raforku.

„Það hefur verið gerð viljayfirlýsing af hálfu Landsvirkjunar um að selja orkuna fyrir norðan til annarra verkefna og þar fyrir utan hefur ekki um nokkra hríð verið fyrir hendi viljayfirlýsing um orkusölu til okkar, hvorki af hálfu ríkisstjórnarinnar né Landsvirkjunar. Það liggur því fyrir að þær forsendur sem við lögðum af stað með í upphafi eru brostnar og því er ekki um neinn annan kost að ræða hjá okkur en draga okkur með formlegum hætti út úr þessu verkefni,“ segir Tómas í umfjöllun um þetta mál í Morgunblaðinu í dag.

Bergur Elías Ágústsson, bæjarstjóri Norðurþings, tekur í sama streng og segir niðurstöðuna vera mikil vonbrigði. Hann sagði að verkefni Alcoa á Bakka hefði notið stuðnings stórs hluta íbúa í Norðurþingi og menn hefðu í lengstu lög viljað trúa því að íbúum Norðurþings og nágrannasveitarfélaga tækist að snúa vörn í sókn. Áfram verði barist fyrir að orkan verði nýtt á svæðinu.