Perlan er til sölu. Árni Sæberg

Sex kauptilboð bárust í Perluna á Öskjuhlíð. Tilboðin voru opnuð hjá fasteignasölunni Mikluborg nú síðdegis. Þau eru nokkuð ólík að gerð og uppbyggingu og farið verður yfir þau og þau metin á næstu dögum, með tilliti til hugsanlegra fyrirvara eða skilmála sem í þeim kunna að vera.

Í tilkynningu frá Orkuveitu Reykjavíkur kemur fram að Perlan sé byggð ofan á sex hitaveitutönkum á Öskuhlíð. Þeir verða ekki eru seldir og munu áfram þjóna hitaveitunni í Reykjavík.

„Perlan var auglýst til sölu í byrjun september og rann tilboðsfrestur út í dag. Hún er ein þeirra eigna sem stjórn OR samþykkti að selja í janúar síðastliðnum. Þá voru einnig settar reglur um söluferli eigna og ákveðið að gefa eigendum fyrirtækisins kost á að kaupa tilteknar eignir áður en þær færu í almenna sölu.

Borgarráð Reykjavíkur ákvað samhljóða á fundi 23. júní sl. að gera ekki athugasemdir við að Perlan færi í almenna sölu og í kjölfarið leitaði OR tilboða í umsjón með sölu stærri eigna. Í því vali varð fasteignasalan Miklaborg hlutskörpust,“ segir í tilkynningunni.

Selja á eignir fyrir 10 milljarða

Þar kemur einnig fram að eignasalan sé hluti aðgerðaáætlunar OR og eigenda vegna fjárhagsvanda OR. „Áætlunin felur í sér sölu á eignum OR sem ekki eru nauðsynlegar kjarnastarfsemi fyrirtækisins. Heildarfjárhæð eignasölunnar á árabilinu 2011 til og með 2016 á að nema 10 milljörðum króna. Nú þegar hefur verið gengið frá sölu neðangreindra eigna.“