mbl.is

Lögreglan á höfuðborgarsvæðinu varar við mikilli hálku á götum og gangstéttum á höfuðborgarsvæðinu og þá sérstaklega í efri byggðum.

Pétur Guðmundsson, varðstjóri hjá lögreglunni, segir að hálkan sé gríðarleg og stórhættuleg. Það sé ís á götum og þegar hann byrji að þiðna í morgunsólinni verði hann enn hættulegri. Hann biður því fólk að fara varlega og gæta að akstursskilyrðum.

Hálka er víðar um landið. Í tilkynningu frá Vegagerðinni segir að á Suðurlandi séu hálkublettir á Hellisheiði, Þrengslum og á Sandskeiði. Hálka er á Mosfellsheiði. Á Vesturlandi er hálka á Holtavörðuheiði og á Fróðárheiði.

Á Vestfjörðum er hálka eða snjóþekja á flestum leiðum. Á Norður- og Norðausturlandi er víða hálka og sumstaðar éljagangur. Á Austurlandi eru hálkublettir á Fagradal og á Hólmahálsi. Hálka er á Möðrudalsöræfum, Jökuldal, Hlíðarvegi, Fjarðarheiði og á Oddsskarði. Snjóþekja er á Breiðdalsheiði.