Ólafur Ragnar afhendir Samfélagslampann. Lengst til hægri er fulltrúi Lions á Íslandi, Kristinn Hannesson, en á milli þeirra Ólafs eru talsmenn Blindrafélagsins, þeir Ólafur Haraldsson og Kristinn Halldór Einarsson. mbl.is

Lionshreyfingin hlaut nýverið Samfélagslampa Blindrafélagsins, samtaka blindra og sjónskertra á Íslandi. Það var forseti Íslands, Ólafur Ragnar Grímsson, sem afhenti lampann.

Samfélagslampinn er veittur Lions á Íslandi árið 2011 fyrir mikilvægan stuðning á undanförnum árum við leiðsöguhunda- og talgervilsverkefni Blindrafélagsins sem leiða til aukins sjálfstæðis og bæta lífsskilyrði fjölmargra blindra og sjónskertra einstaklinga, að því er segir í tilkynningu. Fyrr á þessu ári afhenti Lionshreyfingin Blindrafélaginu til dæmis um 20 milljónir króna vegna talgervilsverkefnisins en þar var um að ræða afrakstur sölu Rauðu fjaðrarinnar.

Samfélagslampi Blindrafélagsins er handsmíðaður gripur af　Sigmari Ó. Maríussyni, gullsmíðameistara. Um er að ræða upphleypta lágmynd úr silfri sem sýnir lampann úr merki Blindrafélagsins. Lampinn er festur á sagaða og slípaða steinflís úr skagfirsku blágrýti. Steinflísin stendur á tveimur járnpinnum á blágrýtisfæti. Á fætinum er síðan silfurskjöldur með áletrun um verkið og tilefni þess.