Standa við yfirlýsingu um innkaup
Ríkisendurskoðun segist telja, að ekkert hafi komið fram sem breyti niðurstöðum stofnunarinnar um innkaup löggæslustofnana sem finna megi í ábendingu hennar frá 27. september sl. Stofnunin standi því við ábendinguna.
Í ábendingunni kom fram að á tímabilinu janúar 2008 til apríl 2011 keyptu löggæslustofnanir vörur af fjórum fyrirtækjum í eigu lögreglumanna eða náinna venslamanna þeirra fyrir samtals rúmlega 91 milljón króna. Að mati Ríkisendurskoðunar fór hluti þessara viðskipta í bága við lög um opinber innkaup.
Ögmundur Jónasson, innanríkisráðherra, sagði í gær að dregin hafi verið upp villandi mynd af málinu þegar gefið væri til kynna að lögreglan hafi ekki farið að lögum og reglum við innkaup. Hins vegar sé nauðsynlegt að koma innkaupum á vegum lögregluembætta í landinu í markvissari farveg eins og Ríkisendurskoðun leggir til.
Á heimasíðu Ríkisendurskoðunar kemur fram, að stofnunin hafi sent innanríkisráðuneytinu bréf þar sem ýmsum athugasemdum ráðuneytisins og embættis ríkislögreglustjóra við ábendinguna sé svarað. Þar sé því einnig fagnað að að ráðuneytið skuli taka undir það mat Ríkisendurskoðunar, að ekki séu í gildi nógu skýrar reglur um framkvæmd innkaupa hjá lögreglu og að það ætli að beita sér fyrir því að stofnanir þess hagi innkaupum sínum í samræmi við lög.
Í bréfinu til ráðuneytisins segir Ríkisendurskoðun m.a., að vandséð sé að hægt sé að halda því fram að í lok október 2009, þegar lögreglan pantaði búnað, hafi verið uppi aðkallandi neyðarástand sem hafi stafað af ófyrirsjáanlegum atburðum sem réttlættu að vikið væri frá meginreglum laga um opinber innkaup. Enda hafi greiningardeild ríkislögreglustjóra spáð fyrir um, að áfram yrði uppi það hættuástand, sem ríkt hafði í heilt ár og ríki enn að mati ríkislögreglustjóra.
„Loks vill Ríkisendurkoðun taka fram, að einmitt vegna þess að viðskipti löggæslustofnana við fyrirtæki sem tengjast lögreglumönnum eru óheppileg sökum þess að þau geta kallað á gagnrýni og sáð efasemdum og tortryggni í huga almennings í garð lögreglu, eins og ráðuneytið og (ríkislögreglustjóri) hafa bent á, er sérstaklega mikilvægt að vandað sé til slíkra innkaupa og ítrustu reglum fylgt í hvívetna," segir í bréfi Ríkisendurskoðunar.
