mbl.is/GSH

Hæstiréttur hefur ómerkt sýknudóm Héraðsdóms Norðurlands vestra yfir manni sem var gefið að sök að hafa káfað innanklæða á 15 ára gamalli stúlku. Hæstiréttur hefur ómertk meðferð málsins frá upphafi aðalmeðferðar og vísað málinu heim í hérað til meðferðar á ný.

Fram kemur í dómi Hæstaréttar að héraðsdómur hafi ekki fellt dóm á málið með með tilliti til allra gagna sem fyrir honum lágu og verði að telja líkur á að niðurstaða héraðsdóms um sönnunargildi munnlegs framburðar fyrir dómi kunni að vera röng svo að einhverju skipti um úrslit málsins.

Manninum var gefið að sök að hafa í þvottahúsi á heimili sínu í maí í fyrra káfað tvisvar innanklæða á rassi stúlkunnar, sem þá var 15 ára gömul, strokið með fingrum um klof hennar innanklæða og í kjölfarið stungið þeim upp í sig og sagt að stúlkan væri flott.

Fram kemur að í héraðsdómi hafi verið komist að þeirri niðurstöðu að framburður vitna, sem hafi borið að stúlkan hafi sagt þeim frá atvikinu, sýnt að hún hafi verið sjálfri sér samkvæm. Á hinn bóginn hafi sá framburður ekkert sannað um hið ætlaða atvik, sem ekkert þessara vitna hafi sjálft séð. Það sama megi segja um sálfræðigögn sem lágu fyrir.

Hæstiréttur taldi að þessi ályktun héraðsdóms fengi ekki staðist, enda yrði við heildarmat á því hvort sönnun hefði verið færð fram af hálfu ákæruvaldsins um sakargiftir á hendur mannsins meðal annars að líta til óbeinna sönnunargagna, sem stutt gætu frásögn stúlkunna.

Héraðsdómur hafði einnig talið að ekki yrði litið framhjá eindregnum framburði sonar mannsins og var sýkna mannsins meðal annars á honum reist.

Hæstiréttur taldi aftur á móti að ekki yrði horft framhjá því að frásögn sonarins hefði í smáatriðum verið á sama veg og framburður föður hans. Sonurinn bar að um 10 sekúndur hefðu liðið frá því að hann vaknaði uns hann hefði verið kominn í gættina á þvottahúsinu þar sem faðir hans og stúlkan voru. Hæstiréttur tók fram varðandi þetta atriði að til þess væri að líta að sonur mannsins hefði verið á unglingsaldri og klukkan ekki orðin sex að morgni.