Frá Sómalíu Reuters

Rúmlega 11.600 Íslendingar studdu söfnun UNICEF, Barnahjálpar Sameinuðu þjóðanna, vegna þurrkana í Austur-Afríku. Aðstoð UNICEF á heimsvísu þýddi að nærri 10 þúsund tonn af hjálpargögnum komust á vettvang þurrkasvæðanna. Þetta kemur fram í tilkynningu frá UNICEF á Íslandi.

Umfangsmiklar mannúðaraðgerðir á þurrkasvæðunum í Austur-Afríku hafa þegar skilað margvíslegum árangri en frekari aðgerða er þörf til að koma í veg fyrir að hundruð þúsunda barna láti lífið af völdum vannæringar og sjúkdóma.

„Við höfum bjargað mörgum börnum í Sómalíu, í flóttamannabúðunum í nágrannaríkjunum, sem og á öðrum svæðum í Keníu, Eþíópíu og Djíbútí þar sem langvarandi þurrkar, stigvaxandi matvælaverð og átök hafa valdið vandræðum,“ segir Elhadj As Sy, svæðisstjóri UNICEF fyrir austur- og suðurhluta Afríku í tilkynningu.

Hjálpargögn til Austur-Afríku

„Sökum stærðargráðu ástandsins þurfum við enn að auka við neyðaraðstoð okkar og á sama tíma leggja grunn að langtíma þróunarverkefnum til að fyrirbyggja að hörmuleg ógæfa sem þessi eigi sér stað að nýju.“

Í nýrri skýrslu kemur fram að hægt hafi verið að meðhöndla 108.000 börn gegn vannæringu, 1,2 milljónir barna hafa verið bólusett gegn mislingum.  2,2 milljónir manna hafa fengið aðgang að hreinu vatni og 48.000 börnum hefur verið tryggður aðgangur að barnvænum svæðum eða öðru öruggu umhverfi.

Spár fyrir regntímabilið frá október og fram í desember gefa til kynna að fæðuöryggi gæti aukist í Keníu og Eþíópíu. Reynslan sýnir á hinn bóginn að regntímabil sem koma eftir mikla þurrka auka hættuna á flóðum og útbreiðslu lífshættulegra sjúkdóma á borð við kóleru og malaríu.

Í Sómalíu er ástandið afar slæmt og umfangsmikilla aðgerða er þörf. Góðu fréttirnar eru að í suður- og miðhluta Sómalíu, þar sem aðgangur mannúðarsamtaka er takmarkaður, hefur UNICEF náð til 350.000 manna. „Neyðarástandinu er langt í frá lokið og það mun ríkja vel fram á árið 2012,“ segir Elhadj As Sy hjá UNICEF, enn fremur í tilkynningu.