Efna á til samkeppni um nafn á sameinuðum skóla. Þessi mynd var tekin eftir skólasetningu Hvassaleitisskóla haustið 2009. mbl.is/Heiddi

Rúnar Pálmason runarp@mbl.is

Þótt sameining Hvassaleitisskóla og Álftamýrarskóla í Reykjavík sé ekki orðin að veruleika hafa áhrifin ekki látið á sér standa því í haust færði nánast heill árgangur sig úr Hvassaleitisskóla yfir í Réttarholtsskóla. Brotthvarfið þykir hafa bitnað á skólabragnum. Ekki er að sjá að sátt sé að takast um sameininguna.

Töluverður titringur er nú meðal foreldra barna í Hvassaleitisskóla vegna þess að skólastjóri verður brátt ráðinn til að stýra sameinuðum skóla. Foreldrafélag Hvassaleitisskóla ályktaði sérstaklega um að nýr skólastjóri yrði fenginn að verkinu sem hefði hvorugum skólanum stjórnað áður. Svo vill hins vegar til að skólastjóri Álftamýrarskóla sótti um en ekki starfssystir hennar í Hvassaleitisskóla.

Meðal þess sem felst í sameiningunni er að unglingadeildin verður flutt úr Hvassaleitisskóla fyrir skólaárið 2012-2013. Foreldrar geta valið um að senda börnin annaðhvort í Álftamýrarskóla eða Réttarholtsskóla.

Í Álftamýrarskóla er kennt í 1.-10. bekk en Réttarholtsskóli er safnskóli fyrir 8.-10. bekk. Þetta réði því í flestum tilvikum að langflestir foreldrar barna í Hvassaleitisskóla sem byrjuðu í 8. bekk í haust ákváðu að börn þeirra myndu fara yfir í Réttarholtsskóla strax í haust. Aðeins einn nemandi í árganginum varð eftir. Hann situr kennslustundir með 9. bekkingum og fær einnig séraðstoð.

Þórunn Kristinsdóttir, skólastjóri Hvassaleitisskóla, segir að það hafi orðið ljóst rétt fyrir skólaslit í vor að enginn 8. bekkur yrði í skólanum í haust. Þetta hafi verið val foreldra en flutningurinn hafi ekki verið á dagskrá af hálfu borgaryfirvalda fyrr en næsta haust. „Foreldrar vildu að nemendur myndu byrja á sama grunni og nemendur úr Fossvogsskóla og Breiðagerðisskóla og það er í sjálfu sér mjög skiljanlegt,“ segir hún.

Áhrifin hafi m.a. verið þau að kennarar hafi ekki fengið þá kennslu sem þeir reiknuðu með að fá og fengu því lægra starfshlutfall. Heldur hafi dofnað yfir félagslífinu og skólabragnum, enda muni um heilan árgang í unglingadeild. Til mótvægis hafa tengslin við Álftamýrarskóla og Réttarholtsskóla verið efld að þessu leyti, m.a. með sameiginlegum skólaskemmtunum.

En það er ekki nóg með að heill árangur hafi flutt sig um set, um 20 nemendur, heldur fóru fjórir 9. bekkingar einnig yfir. Nemendur sem komu úr öðrum skólahverfum fluttu sig einnig um set í nokkrum tilvikum. Þórunn segir að nokkuð hafi verið um að nemendur úr öðrum hverfum hafi gengið í Hvassaleitisskóla enda hafi faglegt starf þar verið traust og skólinn komið vel út úr námskönnunum. Vegna þessa alls sé óljóst hversu margir nemendur verði í sameinuðum skóla.

Skólastjóri yfir sameinuðum skóla verður ráðinn frá og með 1. janúar. Þórunn hefur greint foreldrum frá því að hún muni ekki sækja um. Hún segir afar mikilvægt að nýr skólastjóri komi að starfi stýrihóps um sameininguna sem allra fyrst en fólki þyki sem starfi stýrihópsins hafi miðað heldur hægt.

Vinna að áætlun

Stýrihópurinn sem um ræðir var stofnaður 15. maí. Hann hefur ekki enn gert verk- og tímaáætlun um sameiningarferlið. Auður Árný Stefánsdóttir, formaður hópsins, segir að verið sé að vinna hana. Fyrst hafi þurft að greina verkefnið og forgangsraða verkefnum.

Óvissa um framhaldið

Birgitta Ásgrímsdóttir, formaður Foreldrafélags Hvassaleitisskóla, segir að foreldrum finnist mikil óvissa vera um framgang sameiningarinnar og þeir séu reiðir vegna þess að þeir fái litlar upplýsingar um hvað taki við um áramótin þegar sameiningin á að ganga í gegn. „Það hefur ekkert haldbært komið fram, engar verkáætlanir eða tímaáætlanir,“ segir hún. Foreldrafélagið hafi í vor hvatt til þess að nýr skólastjóri yrði ráðinn strax í haust til að taka þátt í vinnu við sameininguna en borgin ekki fallist á það.

Birgitta segir að ástæðan fyrir því að foreldrafélagið vilji að nýr skólastjóri, þ.e. hvorki skólastjóri Hvassaleitisskóla né Álftamýrarskóla, verði ráðinn til að stýra sameinuðum skóla, sé sú að skólarnir séu mjög ólíkir. Með því að fá nýjan stjórnanda verði á hvorugan skólann hallað.