Ólöglegur utanvegarakstur við Kleifarvatn.

„Það getur vel verið að það séu ferðir í aðrar áttir en þeir eru náttúrlega aðallega að byggja þetta upp á svona utanvegaakstri og þeir eru voðalega fljótir að kalla þetta einhverja slóða, þeir þurfa ekki að fara nema tvisvar-þrisvar á hjólum og spóla einhverja leið, þá kalla þeir það bara slóða.“

Þetta segir Jóhannes Oddsson, einn eigenda jarðarinnar Kalmarstjarnar og Jónkaragerðis, í umfjöllun um utanvegarakstur í Morgunblaðinu í dag. Jóhannes hefur áhyggjur af því að ferðaþjónustufyrirtæki stundi það að fara með ferðamenn í fjórhjólaferðir utanvega í Reykjanesfólkvangi og þá jafnvel inn á einkajarðir.

Að sögn Jóhannesar hafa aðilar á vegum ferðaþjónustufyrirtækisins Fjórhjólaævintýri ehf. ekið í leyfisleysi með ferðamenn á fjórhjólum inn á jörðina sem hann á í sameign með systkinum sínum, segir hann fjórhjólunum bæði hafa verið ekið utanvega en einnig inn á námuveg sem er í einkaeigu þeirra systkina.

Jóhannes segir það alltaf sama sjónarmiðið hjá eigendum Fjórhjólaævintýris að þeir telji sig hafa rétt til að keyra eftir þeim reiðvegum sem hafa verið lagðir af hestamönnum og að landeigendunum sé bannað að loka slíkum slóðum.

Í Morgunblaðinu hafna eigendur Fjórhjólaævintýris þessum ásökunum Jóhannesar. „Utanvegaakstur er eitthvað sem að líðst ekki og þetta fer meira í okkur en sennilega nokkurn annan,“ segir Sigurður Óli Hilmarsson, einn þriggja eigenda Fjórhjólaævintýris ehf.