Réttargeðdeildin á Sogni í Ölfusi. Mynd/Sigurður Jónsson

Á fundi þingmanna Suðurkjördæmis og sveitarstjórnarmanna í Árnessýslu í gær setti Ari Björn Thorarensen, forseti bæjarstjórnar Árborgar, fram þá hugmynd að flytja starfsemi kvennafangelsisins í Kópavogi á Sogn í Ölfusi. Þar er nú rekin réttargeðdeild sem áætlað er að loka og flytja starfsemi hennar til Reykjavíkur.

„Auðvitað vilja menn á þessu svæði að starfsemin sem er nú á Sogni haldi þar áfram. Það er svosem ekki alveg búið að loka á það en menn eru ekki bjartsýnir. Á fundinum í gær var rætt um að það væri gott að koma annarri starfsemi strax inn í þetta hús. Þá setti ég fram þessa hugmynd," segir Ari. Hann segir þingmennina hafa tekið vel í hugmynd sína og hún hafi hlotið góðan hljómgrunn víðar.

Ari lagði til að kvennafangelsið í Kópavogi flytji starfsemi sína að Sogni og starfsemi Hegningarhússins við Skólavörðustíg, sem er á síðasta snúning, verði flutt í húsnæðið í Kópavogi. Gæti það sparað ríkinu þá tvo milljarða sem kostar að byggja nýtt fangelsi á Hólmsheiði. „Ögmundur hefur verið mjög fastur á þeirri skoðun að byggja nýtt fangelsi fyrir tvo milljarða króna á Hólmsheiði. Fangelsismálastofnun vill fylgja honum í þeirri vegferð. En fangelsi á Sogni gæti líka verið ágætis viðbót þar til nýtt fangelsi rís. Það tekur nokkur ár að byggja það og þetta gæti verði lausn þangað til."