Akranes

Bæjarstjórn  Akraness samþykkti á fundi sínum í gær að  stofna   fræðasetur  um  keltnesk  fræði  á  Akranesi  með  aðsetur  á safnasvæðinu á Akranesi.

Í fréttatilkynningu kemur fram að bent  hafi verið á að á Akranesi og í næsta nágrenni séu keltnesk áhrif áberandi,  m.a.  í  örnefnum  á  svæðinu. 

„Áhugi  fræðimanna á þessum þætti Íslandssögunnar, þ.e. landnámi og áhrifum kelta á Íslandi hefur aukist mjög á  undanförnum  árum  og  er  þess vænst að hið nýja fræðasetur um keltnesk fræði á Akranesi verði farvegur fyrir frekari rannsóknir og lifandi umræður um  þetta  áhugaverða efni. Vitað er að fræðimenn greinir nokkuð á um margt er þetta varðar og er þess vænst að fræðasetrið á Akranesi verði vettvangur lifandi  umræðu  um þessi málefni og ýmis önnur sem því tengjast með beinum og óbeinum hætti.

Tilgangur  setursins  er  m.a.  að sinna fræðslu um sögu Akraness, íslenska menningarsögu   og  nágrannalandanna  og stuðla að iðkun fræða og samstarfi innlendra  og  erlendra  fræðastofnana innan vébanda setursins. Fræðasetrið mun  einnig  veita  ráðgjöf  og  stuðning  fyrirtækjum  sem  vilja nýta sér menningarsöguna  í  sinni starfsemi, hvetja til rannsókna, afla heimilda um mannlíf  og  náttúru, stuðla að verndun menningar- og náttúruminja og sinna kynningar-  og útgáfustarfsemi svo og sýningum og gegna upplýsingahlutverki gagnvart  gestum  og  ferðamönnum  um  þessi  efni.   Gert  er ráð fyrir að fræðasetrið  verði  staðsett  á  Safnasvæðinu  á Akranesi, en á næstu vikum verður unnið að frekari undirbúningi og hugað að verkefnum og samstarfi við ýmsa aðila," segir í tilkynningu.