Frá blaðamannafundi slitastjórnar Landsbankans mbl.is/Kristinn Ingvarsson

Ekki hefur verið ákveðið endanlega hvenær verður byrjað að greiða breskum og hollenskum stjórnvöldum inn á forgangskröfur. Þetta kom fram á blaðamannafundi slitastjórnar Landsbankans.

Slitastjórn Landsbankans mun halda fund með kröfuhöfum þann 17. nóvember nk. og þá verður væntanlega farið yfir stöðu mála og það hvenær greitt verði úr búinu en reikna þarf út hverja og einustu kröfu. Ekki liggur hins vegar fyrir hvenær verður búið að leysa úr öllum álitamálum en þegar það verður í höfn mun ekki taka langan tíma að klára útgreiðslur.

Enn er heilmikil vinna eftir og eignasölu er ekki lokið, að sögn slitastjórnar Landsbankans. Slitastjórnin á von á því að einhver ágreiningsmál eigi eftir að enda fyrir dómstólum og jafnvel fara alla leið í Hæstarétt.

Ómögulegt sé að tala um hvað það taki langan tíma að ljúka skiptunum en erlendis er ekki óalgengt að slit á jafn stórum málum taki allt að 10-20 ár en vonir standa til að það taki ekki svo langan tíma í tilviki Landsbankans.

Laust fé þrotabúsins er nærri 500 milljörðum króna eins og staðan er nú. Hluta af því verður haldið til hliðar vegna krafna sem ekki hefur verið leyst úr. Þar á meðal  eru forgangskröfur. Væntanlega verða greiddar nú út í kringum 400 milljarðar króna til Breta og Hollendinga.

Herdís Hallmarsdóttir, formaður slitastjórnar Landsbankans, segir að niðurstaða Hæstaréttar standi hvað Landsbankann varðar enda niðurstaða Hæstaréttar endanleg. Um fjölskipaðan dóm var að ræða þar sem sex dómarar af sjö komust að þessari niðurstöðu.

Hún segir að ef dómurinn hefði fallið á annan veg þá hefði Landsbankinn greitt forgangskröfur að fullu en þær hefðu verið lægri ef það hefði verið niðurstaðan. Það sé hlutverk slitastjórnar að fara að lögum og nú hafi það verið staðfest af Hæstarétti að neyðarlögin standist.

Ekki hægt að gera nauðarsamninga fyrr en búið er að greiða forgangskröfur og þær eru óvenjuháar í hlutfalli við aðrar kröfur.

Ef niðurstaðan hefði verið önnur en þessi þá hefði verið unnið samkvæmt henni en nefndarmenn segjast ánægðir með að þetta var niðurstaðan. Dómurinn sé grundvöllur þess að það liggi fyrir hverjir eru forgangshafar og skiptir því verulegu máli varðandi framvindu skilanna. Það hafi verið forgangsverkefni hjá slitastjórninni strax í upphafi að koma málinu sem fyrst fyrir dóm svo ekki þyrfti að bíða of lengi eftir niðurstöðu.

Ekki liggur fyrir hversu miklar almennu kröfurnar verða en þær hefðu orðið mun hærri ef neyðarlögin hefðu ekki staðist.

Fram kom á blaðamannafundi slitastjórnar Landsbankans að Icesave-krafan er um 1.320 milljarðar króna en ekki er um endanlega tölu en væntanlega verður ekki um stórkostleg frávik frá þeirri fjárhæð að ræða.

Um tvö hundruð heildsöluinnlán og 1.200 önnur mál bíða nú úrlausnar. Heildarfjárhæð heildsölulánanna eru um 160 milljarðar króna. Þetta er hluti af þeim 1.320 milljörðum króna sem um ræðir.