Úr veitingastaðnum Indian Mango.

Héraðsdómur Reykjavíkur hefur fallist á kröfu félags um að rift verði kaupum á veitingastaðnum Indian Mango. Ástæðan er sú að staðurinn fékk ekki endurnýjað vínveitingaleyfi.

Félagið Masala ehf. keypti veitingastaðinn í apríl á síðasta ári af félaginu Indverskum ehf. Kaupverðið var 9 milljónir króna. 

Í júní fengu forsvarsmenn kaupandans símtal frá starfsmanni lögreglustjórans á höfuðborgarsvæðinu og þeim sagt að umsókn þeirra um áfengisveitingaleyfi væri hafnað. Veitingaleyfi staðarins hafði verið endurnýjað árið 2009 með sérstakri undanþágu til ársins 2013.

Vísað var til þess, að húsnæðið að Frakkastíg 12, þar sem veitingahúsið er til húsa, sé á íbúðasvæði samkvæmt aðalskipulagi borgarinnar. Á slíku svæði sé óheimilt að gefa út áfengisveitingaleyfi samkvæmt málsmeðferðarreglum borgarráðs. Fyrir mistök hafi verið gefið út áfengisveitingaleyfi þegar staðurinn var opnaður árið 2005 og það síðan endurnýjað snemma árs 2007. Á grundvelli meðalhófsreglu stjórnsýslulaga og sökum þess að mistökin hafi ekki verið leyfishafa ljós þegar leyfið var fyrst veitt, hafi borgarráð ákveðið að veita jákvæða umsögn um endurnýjun leyfisins til fjögurra ára, enda yrði leyfishafa gerð grein fyrir því að hann gæti ekki búist við því að fá leyfið endurnýjað að fjórum árum liðnum að óbreyttum reglum.

Kaupandinn krafðist þess að fá kaupunum rift á þeirri forsendu, að veitingastaðurinn hafi verið haldið slíkum galla að hann verði metinn til verulegra vanefnda af hálfu seljandans.

Undir það tók dómurinn og segir í niðurstöðu sinni, að gallinn sé verulegur, þar sem máli skiptir fyrir veitingastað, í þeim gæðaflokki sem Indian Mango sé, að hafa vínveitingaleyfi. Þá skipti leyfi til vínveitinga miklu máli fyrir rekstrarafkomu veitingastaðarins „en alkunna er að töluverð álagning er almennt á verði áfengra drykkja sem seldir eru á veitingastöðum."