Breska ríkisútvarpið, BBC, segir að Maria Damanaki, sem fer með sjávarútvegsmál í framkvæmdastjórn Evrópusambandsins, hafi í fyrsta skipti ekki viljað útiloka, að Íslendingar fái makrílveiðiheimildir innan skoskrar lögsögu.

Viðræður eru hafnar milli strandríkja um skiptingu makrílveiðikvótans á næsta ári. Á vef BBC kemur fram, að þegar Damanaki hafi verið spurð hvort hún útiloki, að íslensk fiskiskip fái að veiða makríl innan skoskrar lögsögu svaraði hún: „Það sem við getum gert er að stöðva innflutning ef veiðar þeirra eru ekki sjálfbærar. Samningaviðræður standa yfir. Við munum láta ykkur vita um leið og eitthvað verður að frétta."

Skoskir veiðimenn segja, að ef Íslendingar fái að veiða makríl innan lögsögu Evrópusambandsins væri verið að verðlauna óábyrga framkomu þeirra en Íslendingar og Færeyingar hafa undanfarin ár ákveðið einhliða makrílkvóta þar sem ekki hefur náðst samkomulag við Evrópusambandið og Noreg um skiptingu heildaraflans.

BBC sagði frá því í september, að eftirlit með veiðunum á svæðinu milli Færeyja og Skotlands hefði verið hert af ótta við ólöglegar makrílveiðar.