Kristinn Ingvarsson

Gífurleg fjölgun hefur orðið í laganámi á Íslandi á undanförnum árum. Alls eru skráðir 920 lögmenn á Íslandi og á sama tíma eru nærri því 2000 einstaklingar í laganámi í fjórum háskólum samkvæmt frétt á Pressunni.

Brynjar Níelsson, formaður lögmannafélags Íslands, segir fjölgunina vera vegna aukins framboðs á laganámi en hún þurfi ekki endilega að kalla á atvinnuleysi meðal lögfræðinga. Þá telur Brynjar æskilegt að breyta framkvæmd og kröfum í lögmannsprófinu.

„Lögfræðingar gera ýmislegt og sinna mörgum störfum. Lögfræðingar eru alls staðar í stjórnsýslunni og vinna ýmis störf hjá fyrirtækjum en þeir sem eru í lögmennsku og stunda lögmannsstörf eru orðnir mjög margir og það mun fljótlega fara að þrengja að þeim. Það er mín skoðun að fólk þurfi að hafa starfað annað hvort á stofu eða verið aðstoðarmenn dómara áður en það getur tekið lögmannsprófið.“

Fjölgun háskóla á Íslandi hefur orðið til þess að fleira fólk leitar í klassískar greinar eins og lögfræði, viðskiptafræði og sálfræði að sögn Brynjars sem telur að auka þurfi áherslu á aðrir fræðigreinar líka líkt og tækni- og raungreinar til þess að halda fjölbreytileika á vinnumarkaðnum.