Hluti þýfisins sem lögreglan hefur lagt hald á

Hæstiréttur Íslands staðfesti á föstudag gæsluvarðhaldsúrskurð yfir 17 ára gamalli stúlku, sem ásamt móður sinni er grunuð um stórfelldan þjófnað úr verslunum á höfuðborgarsvæðinu.

Mæðgurnar voru staðnar að verki við þjófnað í Smáralind þann 20. október. Reyndust þær hafa á sér þýfi að verðmæti rúmlega 200 þúsund króna. Af greinargerð lögreglu má ráða að mæðgurnar hafi verið sérstaklega útsmognar, en það vakti athygli lögreglu að þýfið var geymt í sérstaklega útbúnum poka, sem var fóðraður að innan með álpappír til að koma í veg fyrir að þjófavarnakerfi verslana næmu innihald hans. Þessar aðferðir sem mæðgurnar beittu gáfu lögreglu strax vísbendingar um að um skipulagða glæpastarfsemi væri að ræða.

Í ljósi þessa og að mæðgurnar höfðu áður komið við sögu hjá lögreglu var talin ástæða til að leita á heimili þeirra. Á heimili móðurinnar lagði lögregla hald á mikið magn af fötum sem sterkur grunur er á að hafi verið stolið úr verslunum, enda voru flest enn með merkimiða áfasta. Í íbúðinni fannst einnig 21 kannabisplanta í sérútbúnu herbergi ætluðu til ræktunar. Á heimili dótturinnar seinna um daginn fannst svo einnig talsvert magn af fatnaði sem einnig er talið vera þýfi.

Mæðgunum var sleppt að loknum yfirheyrslum en fjórum dögum síðar var gerð endurtekin húsleit heima hjá þeim og fannst þá mikið magn af fatnaði til viðbótar sem ekki hafði verið þar við fyrri leit. Ætlað þýfi sem fannst þá fyllti 40 svarta ruslapoka og áætlar lögregla að það sé um 10-15 milljóna króna virði enda um dýrar merkjavörur að ræða. Þá fannst í íbúð móðurinnar tæp hálf milljón króna í reiðufé.

Lögregla telur því líklegast að íbúðir mæðgnanna séu annaðhvort notaðar sem geymslupláss fyrir afrakstur skipulagðrar þjófnaðarstarfsemi eða þá að mæðgurnar hafi haldið áfram uppteknum hætti við þjófnað strax eftir að þeim var sleppt úr yfirheyrslu.

Mæðgurnar sæta báðar gæsluvarðhaldi til 2. nóvember og munu sitja í einangrun á meðan vegna rannsóknarhagsmuna.