Við Hvalfjarðargöng. Árni Sæberg

Hvalfjarðargöng verða lokuð vegna viðhaldsvinnu aðfaranótt fimmtudags 3. nóvember og næstu 12 virkar nætur frá klukkan 24:00 til klukkan 06:00 að morgni. Um helgar verða göngin opin samkvæmt venju. Víða er hálka á vegum landsins.

Samkvæmt umferðarþjónustu Vegagerðarinnar er spáð hitaskilum með hvassri NA-átt sem fara norður og norðvestur yfir landið í nótt. Reikna má með hríðarveðri og takmörkuðu skyggi á hæstu fjallvegum frá því í kvöld, á Möðrudalsöræfum, Vopnafjarðarheiði og Fjarðarheiði og undir miðnætti  á Holtvörðuheiði, Öxnadalsheiði og ef til vill víðar. 

Áfram er búist við mikilli veðurhæð, skafrenningi og síðar hríð á Steingrímsfjarðarheiði og á Þröskuldum. Á lægri fjallvegum er varsamur krapi líklegur til að byrja með í kvöld en síðan rigning og vatnselgur. 

Þá er gert er ráð fyrir hviðuveðri, 30-35 m/s á Kjalarnesi, undir Hafnarfjalli og á veginum um Staðarsveit þar til seint í nótt þegar lægir.

Óveður er á Kjalarnesi og undir Hafnarfjalli og óveður er einnig á sunnanverðu Snæfellsnesi. Hálkublettir eru á Bröttubrekku, Holtavörðuheiði og Laxárdalsheiði. Hálka og óveður er í Svínadal.

Á Vestfjörðum er snjóþekja og óveður á Steingrímsfjarðarheiði, óveður geysar einnig á Klettshálsi þar sem það er þæfingsfærð. Ófært er um Þröskulda og í Árneshrepp. Vegfarendum sem eiga leið á Hólmavík er bent á að fara Ennisháls og strandir.

Hálkublettir eru í Ísafjarðardjúpi en hálka á  Gemlufallsheiði. Dynjandisheiði er þungfær og Hrafnseyrarheiði ófær.

Á Norðvesturlandi eru hálkublettir á Vatnsskarði og hálka á Þverárfjalli, í Langadal og á Siglufjarðarvegi.

Á Norðausturlandi er hálka og éljagangur á Öxnadalsheiði og Víkurskarði. Hálka og éljagangur er á Mývatnsheiði og á Mývatnsöræfum. Þungfært er á Hólasandi. Éljagangur er víða.

Á Austurlandi er hálka á  Möðrudalsöræfum, Sandvíkurheiði og Öxi. Hálkublettir eru á Vopnafjarðarheiði,Vatnsskarði eystra, Breiðdalsheiði og á Fagradal. Þæfingsfærð er á Hellisheiði eystri.