mbl.is/RAX

Héraðsdómur Austurlands hefur dæmt karlmann í þriggja mánaða skilorðsbundið fangelsi fyrir líkamsárás á Reyðarfirði í febrúar sl. Þá er manninum gert að greiða 366.460 krónur í sakarkostnað.

Manninum var gefið að sök að hafa slegið annan mann hnefahögg í höfuðið, með þeim afleiðingum að hann hlaut djúpan 3,5 sm langan skurð á hægri augabrún og bólgu á hægri kinn. Ákærði neitaði hins vegar sök.

Fram kemur í dóminum að samkvæmt fyrirliggjandi sakavottorði eigi maðurinn sér óslitinn sakaferil á árabilinu 2001 til 2006. Á því tímabili hlaut hann sjö dóma fyrir brot á almennum hegningarlögum. Þar af var hann tvisvar dæmdur fyrir líkamsárásir sem báðar töldust varða við 1. mgr. 217. gr. almennra hegningarlaga. Auk þess sem hann var í einu tilviki að auki dæmdur fyrir umferðarlagabrot.

Síðast hlaut maðurinn dóm 2. júní 2006 fyrir þjófnað og var hann þá dæmdur til fjögurra mánaða óskilorðsbundinnar fangelsisvistar. Var þá um að ræða hegningarauka við dóm sem ákærði hlaut 24. október 2005 fyrir þjófnað og tilraun til þjófnaðar.

Þeir dómar sem maðurinn hlaut fyrir líkamsárásir voru kveðnir upp 5. júní 2003 og 11. maí 2005, en einungis síðari dómurinn hefur ítrekunaráhrif í máli þessu.

Honum var veitt reynslulausn 15. maí 2009, skilorðsbundið í eitt ár, af eftirstöðvum refsingar óskilorðsbundinna fangelsisdóma sem hann hlaut á árunum 2005-2006. Stóðst hann þá reynslulausn.

Þá segir að við ákvörðun refsingar mannsins sé tekið mið af því að nokkur áverki hafi hlotist af árásinni. Af hálfu ákærða er því borið við að hinn maðurinn hafi átt upptök að árásinni með því að kyssa eða reyna að kyssa unnustu hans. Um það standi orð brotaþola gegn orðum hennar, en ljóst sé af framburðum vitna að ásakanir um þetta hafi komið upp. Þótti því rétt að taka mið af því við ákvörðun refsingar mannsins að brot hans hefði verið framið í geðshræringu.