Þegar ekið er út af endurvinnslustöðinni má aðeins taka beygju til hægri, niður Dalveginn, en bannað að taka beygju upp götuna. Flutningabílnum var ekið í veg fyrir hjólreiðamanninn sem lenti undir bílnum og stórslasaðist. mbl.is/Rannsóknarnefnd umferðarslysa

Kantsteini við útkeyrslu út af endurvinnslustöð Sorpu á Dalvegi var breytt í fyrra, samkvæmt upplýsingum sem fengust hjá Kópavogsbæ í gær. Afleiðingin af breytingunni er sú að ökumönnum var gert auðveldara að taka ólöglega beygju inn á stöðina, gegn einstefnu.

Eins og flestum er kunnugt varð alvarlegt slys við stöðina á Dalvegi 19. október þegar gámaflutningabíll tók ólöglega beygju, gegn einstefnu, og ók yfir hjólreiðamann sem var á leið niður stíginn, í sömu átt og bíllinn. Eins og fram hefur komið í Morgunblaðinu var það haft sem vinnuregla að aka gámaflutningabílum inn á móti einstefnunni.

Lögregla rannsakar nú slysið m.a. með tilliti til hugsanlegrar refsiábyrgðar stjórnenda. Í kjölfar slyssins vakti strax athygli að umferðarmannvirki virtust beinlínis hönnuð til að auðvelt væri að beygja inn á gámasvæðið, þrátt fyrir að það sé ólöglegt og að gatan sé í skipulagi Kópavogs flokkuð sem einstefnugata. Í deiliskipulagsuppdrætti af stöðinni sést greinilega að teikning af kantsteininum er mjög frábrugðin því hvernig hann er í raun og veru. Í umfjöllun um mál þetta í Morgunblaðinu í dag kemur fram, að samkvæmt uppdrættinum hefði sá sem vildi aka á móti einstefnu þurft að taka krappa beygju en eins og sést á myndinni hér fyrir ofan er kantsteinninn hafður þannig að auðvelt er að taka ólöglega beygju inn á svæðið.