Alma kemur til Hornafjarðar. mbl.is/Sverrir Aðalsteinsson/Marine Traffic

Talið er að ekki verði búið að koma flutningaskipinu Ölmu í örugga höfn fyrr en í kvöld en skipið er í fylgd Hoffells á rólegri siglingu en það verður dregið austur fyrir Stokksnes, samkvæmt upplýsingum frá Landhelgisgæslunni.

Landhelgisgæslunni barst klukkan rúmlega þrjú í nótt aðstoðarbeiðni frá Birni Lóðs, dráttarbátnum á Höfn í Hornafirði vegna Ölmu, en stýri þess virkaði ekki þegar verið var að aðstoða skipið út fyrir ós í Hornafirði. Var stýrisblað farið, en skrúfa og vél skipsins voru í lagi.

Um kl. 06:00 var komin dráttartaug komin milli Ölmu og Hoffells og var þá hættuástandi aflýst. Björgunarskipi Slysavarnarfélagsins Landsbjargar og Vetti, lóðsinum á Reyðarfirði var því snúið til hafnar. Þyrla Landhelgisgæslunnar verður á Höfn í Hornafirði og til aðstoðar ef á þarf að halda.

Flutningaskipið verður dregið austur fyrir Stokksnes vegna SV áttar á svæðinu og síðan í var á Berufirði eða Reyðarfirði. Á svæðinu er nú SA 10-15 m/sek en á að snúast í SV hvassviðri, 15-20 m/sek, síðar í dag.

Alma er um 100 m langt skip og  skráð á Kýpur, en það hefur að undanförnu haft viðkomu í  Vestmannaeyjum og á Hornafirði.