Afar slæmt verður er víða um land og er óveður undir Hafnarfjalli og varað við snörpum vindhviðum víða mbl.is/Rax

Veginum um Álftafjörð á Snæfellsnesi hefur verið lokað vegna aurskriðu sem féll á veginn. Vonskuveður er víða og gera má ráð fyrir vindhviðum undir Hafnarfjalli allt að 40-45 m/s. og víða á norðanverðum Snæfellsnesi þar til í fyrramálið að það tekur að lægja.

Eins má reikna með snörpum hviðum við Hnífsdal og Arnardal á Súðavíkurvegi og á Siglufjarðavegi, meðal annars í Fljótum og við Sauðanesvita, samkvæmt upplýsingum frá Vegagerðinni. 

Vegir eru auðir á Suður- og Suðausturlandi.

Á Vesturlandi er óveður undir Hafnarfjalli, á norðanverðu Snæfellsnesi, Fróðárheiði og Holtavörðuheiði.

Á Vestfjörðum er krapi í Ísafjarðardjúp, á Hálfdán og Dynjandisheiði. Þæfingsfærð og skafrenningur er á Hrafnseyrarheiði. Hálka er svo á Steingrímsfjarðarheiði og hálkublettir um Þröskulda.

Vegir eru að mestu auðir á Norðurlandi en þó eru hálkublettir á Öxnadalsheiði og Mývatnsöræfum en hálka á Hólasandi.

Á Austurlandi eru hálkublettir á Möðrudalsöræfum en vegir annars greiðfærir.