Tannlæknar mega ekki veita kortafyrirtækjum upplýsingar um hvaða læknisþjónustu þeir veita einstaklingum sem til þeirra leita. mbl.is/Árni Sæberg

Tannlæknum er óheimilt að veita kortafyrirtækjum upplýsingar um hvaða læknismeðferð einstaklingar fá hjá þeim þó að þeir fái kortalán vegna þjónustu á tannlæknastofu, skv. áliti Persónuverndar.

Tannlæknafélag Íslands spurði Persónuvernd hvort tannlæknar mættu afhenda kortafyrirtæki upplýsingar um kortalán vegna læknismeðferðar og afrit vörureikninga. Fram kom í bréfi Tannlæknafélagsins til Persónuverndar að Valitor hf. biðji tannlækna um undirrituð frumrit kortalánssamninga sem gerðir hafi verið í tengslum við meðferð og einnig afrit af vörureikningi.

Vörureikningar séu hins vegar jafnvel hluti sjúkraskrár „og á honum kemur fram hvaða meðferð er veitt svo þetta eru þá trúnaðargögn úr sjúkraskrám og finnst tannlæknum óþægilegt að verið sé að biðja um þessar upplýsingar enda eru tannlæknar bundnir trúnaði við skjólstæðinga sína,“ sagði í erindi félagsins til Persónuverndar.

Í umfjöllun Persónuverndar á heimasíðu hennar segir að Valitor hf. sé heimilt að fara fram á afrit kortalánssamninga vegna tannlæknaþjónustu, sem og þær upplýsingar á vörureikningum sem nauðsynlegar eru vegna innheimtu slíkra lána. Upplýsingar um hvaða þjónusta hefur verið veitt tilteknum einstaklingi megi hins vegar ekki senda fyrirtækinu.