mbl.is/Eggert Jóhannesson

Hólmfríður Gísladóttir holmfridur@mbl.is

Síðustu vikur hafa niðurstöður úr samræmdum könnunarprófum í 4., 7. og 10. bekk grunnskólanna verið birtar á vef Námsmatsstofnunnar en tilgangurinn með prófunum er að kanna stöðu nemenda í íslensku og stærðfræði, og í ensku í 10. bekk. Að þessu sinni var ákveðið að gera niðurstöðurnar ljósar smám saman í stað þess að bíða þar til samantektarskýrsla yrði gefin út; þannig hafa þegar verið birtar meðaleinkunnir og normaldreifðar einkunnir eftir landshlutum, svo og meðaltöl eftir sveitarfélögum.

Niðurstöðurnar eru birtar á normaldreifðum einkunnaskala, kvarða sem Námsmatsstofnun tók upp árið 2004 og kallast Grunnskólaeinkunn. Þar er meðaltal á landsvísu í hverri námsgrein 30 og staðalfrávik 10, en tilgangur kvarðans er að gera niðurstöður prófanna samanburðarhæfar milli ára. Þetta gerir skólum kleift að fylgjast með árangri sínum ár frá ári og bera sig saman við aðra skóla.

Prófin eru þó ekki gerð sérstaklega með skólana í huga. „Fyrst og fremst eru þessi próf gerð fyrir nemendur. Ef verkefni okkar væri að meta skólana þá myndum við búa til öðruvísi próf,“ segir Sigurgrímur Skúlason, próffræðingur og sviðsstjóri prófadeildar Námsmatsstofnunnar.

Rúmfræðin þrautin þyngri

Sigurgrímur segir prófin þó þjóna margþættum tilgangi og þau séu m.a. tæki fyrir skólana, foreldra og sveitarfélögin, til að meta stöðu nemenda og skólanna sjálfra. Því séu niðurstöðurnar m.a. flokkaðar eftir skólum og sveitarfélögum en við samanburð verði þó alltaf að hafa í huga afar misjafna stærð skólanna.

Niðurstöður fyrir einstaka skóla eru væntanlegar á næstu dögum að sögn Sigurgríms og eru ef til vill þær niðurstöður sem beðið er eftir af mestri eftirvæntingu. Þó er ýmislegt forvitnilegt að finna í þeim samantektum sem þegar hafa verið gefnar út.

Til að mynda var meðaleinkunn 4. bekkjar í íslensku 6,3 en meðal einstakra þátta kom „ritun“ verst út og var meðaleinkunnin í þeim þætti aðeins 5,0. Hvað þetta varðar segir Sigurgrímur þó að hafa beri í huga að gerðar séu meiri kröfur til nemenda hvað þennan þátt varðar en t.d. í lesskilningsþættinum. Það er að mörgu að huga.

Í 7. bekk kom þátturinn „rúmfræði og mælingar“ verst út í stærðfræðiprófinu og var meðaleinkunnin í þeim þætti 5,7 en meðaleinkunnin í faginu yfir heildina var 6,7. Frammistaðan í þessum ákveðna þætti virðist ekki batna með aldrinum því nemendur 10. bekkjar fengu 5,3 í meðaleinkunn í þættinum „rúmfræði“ á prófinu í stærðfræði, þar sem meðaleinkunnin yfir heildina var 5,9. Það var þó ekki sá þáttur sem kom verst út því meðaleinkunnin fyrir þáttinn „algebra“ reyndist aðeins 5,0.

Góður árangur Garðabæjar

Séu meðaltöl sveitarfélaganna skoðuð kemur einnig ýmislegt athyglivert í ljós en þar er gefið eftir fyrrnefndum kvarða, Grunnskólaeinkunn, þar sem landsmeðaltalið er 30.

Ef litið er til sveitarfélaga þar sem próftakar voru fleiri en 100 kom Garðabær t.d. áberandi best út en þar var meðaltalið í stærðfræði í 4. bekk t.d. 33,4 og í 7. bekk 34,2. Nemendur í 7. og 10. bekk í Mosfellsbæ komu einnig ágætlega út en í 4. bekk reyndist meðaltalið með lægra móti, 27,5 í íslensku og 26,7 í stærðfræði.

Próf

7,3

var meðaleinkunn tíundabekkinga í ensku. Meðaleinkunnin í stærðfræði var 5,9 og í íslensku 6,5.

3.850

er námundaður fjöldi próftaka í samræmdu könnunarprófunum í 7. bekk. Þeir voru um 3.670 í 4. bekk og 4.050 í 10. bekk.

34,2

er meðaltal einkunna nemenda í Garðabæ í stærðfræði skv. Grunnskólaeinkunnakvarðanum.

3

prófatriði voru felld úr stærðfræðiprófi 10. bekkjar og 1 úr íslenskuprófinu.