Ráðhús Reykjavíkur. mbl.is/Eggert

Umboðsmaður Alþingis hefur skrifað Reykjavíkurborg bréf og óskað eftir upplýsingum um tiltekin atriði er snúa að afhendingu upplýsinga um fjölda lausra leikskólaplássa í borginni. Verið er að athuga hvort hömlur hafi verið lagðar á tjáningarfrelsi opinberra starfsmanna í tengslum við fréttaflutning RÚV um málefni leikskóla.

Er upplýsinganna óskað til að umboðsmaður geti metið hvort tilefni sé fyrir hann að taka málið til athugunar að eigin frumkvæði. Hefur Reykjavíkurborg verið veittur frestur til 9. desember 2011 til að svara bréfinu, sem er dagsett 8. nóvember.

Fram kemur á vef umboðsmanns Alþingis að eitt af því sem stofnunin gætir í eftirliti sínu með starfsemi stjórnvalda sé hvort lagðar séu hömlur á tjáningarfrelsi opinberra starfsmanna eða möguleika forstöðumanna á að veita þeim, sem þess óska, upplýsingar um starfsemi sína með tilheyrandi takmörkunum á möguleikum almennings til upplýstrar umræðu.

Í bréfinu spyr umboðsmaður hvort leikskólastjórum í Reykjavík hafi verið gefin bein fyrirmæli um að veita fréttastofu Ríkisútvarpsins ekki upplýsingar um fjölda lausra plássa í leikskólum borgarinnar og þá hver hafi veitt fyrirmælin og á hvaða grundvelli.

Í öðru lagi óskaði umboðsmaður eftir því að fá send afrit af öllum samskiptum Reykjavíkurborgar við leikskólastjóra sem vörðuðu fyrirspurn Ríkisútvarpsins.

Í þriðja lagi óskaði umboðsmaður eftir upplýsingum um það á hvaða lagagrundvelli synjun Reykjavíkurborgar á beiðni fréttastofu Ríkisútvarpsins um upplýsingar um fjölda lausra plássa í leikskólum borgarinnar byggðist.