Lögreglan á Blönduósi stöðvaði í gær ökumann á 130 km hraða á þjóðvegi eitt við Vatnsdal. Grunur kviknaði hjá lögreglu um að maðurinn hefði óhreint mjöl í pokahorninu, og reyndist svo vera eftir að fíkniefnahundur lögreglunnar hafði þefað uppi nokkur grömm af hörðum fíkniefnum.

Um góðkunningja lögreglunnar var að ræða, sem áður hefur komið við sögu í fíkniefnamálum. Sagðist maðurinn vera á leiðinni til Akureyrar. Við fyrstu leit á staðnum fannst ekkert í bílnum, en farið var með bílinn á Blönduós og ökumanninn til yfirheyrslu. Eftir að fíkniefnahundur lögreglunnar á Blönduós var fenginn til aðstoðar fundust fíkniefni sem höfðu verið falin vandlega í bílnum.

Við yfirheyrslu neitaði maðurinn að hafa átt fíkniefnin. Var honum sleppt seint í gærkvöldi og bíður hans ákæra fyrir hraðakstur og meðferð fíkniefna. Að sögn lögreglunnar á Blönduósi sannaði fíkniefnahundur embættisins enn og aftur gildi sitt. Á seinni árum hafa komið upp allnokkur mál, þar sem verið er að flytja fíkniefni um þjóðveginn gegnum Húnaþing, einkum norður og austur í land frá höfuðborgarsvæðinu. Þar hefur hundurinn komið upp um marga ökumenn.