Héraðsdómur Reykjaness. mbl.is/Ómar Óskarsson

Kona sem starfaði sem bókari og gjaldkeri á fasteignasölu var í dag dæmd í sex mánaða skilorðsbundið fangelsi fyrir fjárdrátt í Héraðsdómi Reykjaness.

Krafðist fasteignasalan þess að konan greiddi rúmar 6 milljónir króna í skaðabætur en ekki var dæmt í þeim hluta málsins þar sem konan og fasteignasalan hafa komist að samkomulagi um greiðslu skaðabóta.

Konan játaði brot sín en á árunum 2007 og 2008 dró hún sér fé af reikningum fasteignasölunnar, notaði kreditkort hennar í heimildarleysi og tók út vörur víða í nafni fasteignasölunnar.

Bar fyrir sig erfiða æsku og að aðrir hafi hagnast á brotunum

Konan sem er fædd árið 1975 hefur ekki áður gerst sek um refsiverða háttsemi. Þar sem hún hefur skýlaust játað brot sín og samþykkt að greiða skaðabætur er það virt henni til málsbóta. Til refsiþyngingar horfir að konan dró sér mikla fjármuni og brotin ná yfir langt tímabil. Ekki er fallist á með konunni að aðstæður hennar, erfiðleikar í æsku og erfitt heimilislíf undanfarin ár, hafi áhrif til refsilækkunar.

Þá segir konan að hún hafi ekki ein hagnast af brotunum heldur hafi félag sem eiginmaður hennar átti og starfsfélagi hans notið ágóða af þeim, en ekki með vitund þeirra. Einnig segir konan að mál þetta hafi haft mikil áhrif á líf hennar, m.a. hafi hún flutt úr landi. Að mati dómsins getur þetta ekki haft áhrif á refsiákvörðun í máli þessu.

Með vísan til alls framangreinds og dómaframkvæmdar þykir refsing konunnar hæfilega ákveðin fangelsi í sex mánuði. Við ákvörðun þess hvort refsingin verði bundin skilorði ber að líta til þess að hún hefur ekki áður gerst sek um refsiverða háttsemi og óútskýrður dráttur var á rannsókn málsins, en kæra var lögð fram 14. nóvember 2008 og ákæra gefin út 12. apríl 2011. Verður refsing konunnar því bundin skilorði, segir í niðurstöðu héraðsdóms.