Það er Svandís Svavarsdóttir umhverfisráðherra sem svarar fyrir rjúpuna á teikningunni.

Skilti í Skorradal með ábendingu til veiðimanna um að rjúpnaveiði sé bönnuð hefur vakið mikla athygli. Það eru landeigendur í Efri-Hrepp í Skorradal sem komu skiltunum fyrir. Jóhannes Guðjónsson segir að veiðimenn hafi virt veiðibannaði eftir að skiltin voru sett upp.

Það var Bjarni Þór Bjarnason teiknari á Akranesi sem teiknaði skiltin, en á þeim kemur Svandís Svavarsdóttir umhverfisráðherra, í gervi rjúpu, þeim skilaboðum áfram að banna sé að veiða rjúpu.

Jóhannes segir að lítið sé um rjúpu í Efri-Hrepp. Þar sé hins vegar mikil skógrækt og ef einhverjar rjúpur séu þar þá séu þær eins spakar og hænur. Veiðibann hefur verið í Efri-Hrepp undanfarin ár og segir Jóhannes að þeir sem ekki hafi virt bannið hafi yfirleitt gengi frá þessum spaka stofni ef þeir hafi farið inn í skóginn. Sem betur fer hafi bannið verið virt síðan nýju skiltin voru sett upp.

Heimilt er að veiða rjúpu um næstu tvær helgar, en víða hafa landeigendur sett á veiðibann.