Bjarni Benediktsson, formaður Sjálfstæðisflokksins, sagði í setningarræðu sinni á landsfundi flokksins nú síðdegis, að þjóðin verði að hefja sköpun nýrra verðmæta til að komast úr sporunum.

„Ef kraftar fólks og fyrirtækja á Íslandi eiga að fá að njóta sín til að skapa verðmæti, verður að leiða stefnu Sjálfstæðisflokksins til öndvegis við stjórn landsins," sagði Bjarni. 
„Því fyrr sem (kosningar) verða haldnar, því betra fyrir Sjálfstæðisflokkinn, en það sem mestu skiptir, því betra fyrir fólkið í landinu," sagði Bjarni.

Hann sagði, að nýta ætti tækifærin sem felast í aukinni orkusölu. „Það eina sem þarf er vilji til að nýta auðlindirnar í góðri sátt við umhverfið.  Framtíðin geymir ótrúleg tækifæri á þessu sviði, orkuverð fer hækkandi og hrein orka verður eftirsóttari með hverjum degi.

Þessi tækifæri verðum við að nýta til að halda áfram að bæta lífskjörin. Við höfum græna orku.  Við höfum vel menntað fólk.  Fjárfestar um allan heim leita tækifæra þar sem þetta tvennt fer saman.   Þarna eru tækifæri sem við verðum að grípa."

Upp úr skotgröfum

Bjarni fjallaði um Evrópumál í ræðu sinni og sagði að skoðanir væru skiptar innan Sjálfstæðisflokksins um Evrópusambandsaðild.

„Þær raddir heyrast úr röðum aðildarsinna, að of oft sé afstöðu þeirra mótmælt með stóryrðum. Ég vil hvetja flokksmenn, sem kunna að hafa búið um sig í skotgröfum í þessu máli, til að stíga upp úr þeim. Það gildir á báða bóga.

Öll berum við hagsmuni Íslands fyrir brjósti af einlægni," sagði Bjarni.

Hann bætti við að síðasti landsfundur flokksins hefði ályktað að draga bæri aðildarumsóknina til baka. „Það er stefna flokksins og hún er skýr," sagði Bjarni. Að mínu mati er þetta rökrétt niðurstaða, óháð því hvaða afstöðu menn hafa til aðildar, því að það er beinlínis óheiðarlegt af okkur sem þjóð, og grefur undan virðingu okkar á alþjóðavettvangi, að standa í svo þýðingarmiklum viðræðum þegar hugur fylgir alls ekki máli, hvorki hjá þjóðinni né hjá ríkisstjórninni sem stendur að leiðangrinum."

Stuðningi lýst við Geir

Bjarni sagði í ræðu sinni, að það hefði verið sérstakt áhugamál núverandi stjórnvalda að ná sér niðri á fyrrverandi forystumönnum Sjálfstæðisflokksins. Ítrekað hefði verið vegið að Davíð Oddssyni, fyrrverandi formanni flokksins og farsælasta forsætisráðherra seinni tíma.  Eitt fyrsta verk minnihlutastjórnarinnar vorið 2009 hefði verið að hrekja Davíð úr stóli seðlabankastjóra, undir þeim ótrúlegu formerkjum að ráðast þyrfti í hreinsanir í þjóðfélaginu. 

Þá hefðu íslensk stjórnmál náð nýjum lægðum þegar meirihluti þingmanna ákvað að efna til pólitískra réttarhalda yfir Geir H. Haarde, fyrrverandi formanni flokksins. 

„Við þig, Geir, vil ég segja persónulega, að mér blöskrar þessi aðför og ég stend heilshugar á bakvið þig í þessu máli," sagði Bjarni. „Það gerir líka hver einasti þingmaður Sjálfstæðisflokksins. Hver einasti sveitarstjórnarmaður Sjálfstæðisflokksins styður þig. Og ég veit að ég tala fyrir hönd allra sem hér eru inni, fyrir hönd hvers einasta sjálfstæðismanns á landinu, og þúsunda Íslendinga, þegar ég segi við þig: Við stöndum öll með þér," sagði Bjarni og þurfti að ræskja sig þegar röddin brást.

Blaut tuska

Bjarni sagði í ræðu sinni, að sjálfstæðismenn krefðust þess af bönkunum að þeir geri almennilega grein fyrir þeim afslætti sem þeir fengu af lánum til heimila, svo að það sjáist svart á hvítu hvaða svigrúm þeir hafa til frekari afskrifta.

„Það er blaut tuska í andlit okkar allra þegar það er upplýst að 76 milljarðar króna renni til erlendra kröfuhafa og þá fyrst og fremst vogunarsjóða, vegna endurmats á eignum viðskiptabankanna.  Hvaða réttlæti er fólgið í því að erlendir spákaupmenn sem hafa makað krókinn á falli íslenska fjármálakerfisins græði 76 milljarða á meðan fjölskyldurnar í landinu berjast við að halda heimilum sínum?" sagði Bjarni.

Upptaka af ræðu Bjarna