Fyrsta verk að lækka skatta
Ólöf Nordal, Bjarni Benediktsson og Ragnheiður Elín Árnadóttir á landsfundi Sjálfstæðisflokksins mbl.is/Golli
Fyrsta verkefni Sjálfstæðisflokksins þegar hann kemst til valda er að lækka skatta. Þetta sagði Ólöf Nordal, varaformaður flokksins, í fyrirspurnartíma á landsfundi. Bjarni Benediktsson, formaður flokksins, tók heilshugar undir orð Ólafar.
Farið var um víðan völl í fyrirspurnartímanum þó svo fyrirspurnir hafi látið á sér standa í upphafi. Meðal þess sem þau Bjarni, Ólöf og Ragnheiður Elín Árnadóttir, þingflokksformaður, voru spurð út í voru Evrópumál, gjaldmiðilsmál, skattamál, skuldaniðurfelling, flugvöllurinn í Reykjavík og landakaup útlendinga.
Hvað Evrópumálin varðar þá árétti forystan í heild sinni sína afstöðu, sem er í takt við ályktun síðasta landsfundar, þ.e. að Íslandi sé betur borgið utan Evrópusambandsins. Ragnheiður Elín lýsti því að hún vill að viðræðum verði slitið og Ólöf sagði trúverðugleika Íslands í hættu með viðræðunum. Þau voru þó sammála um að tímabært væri að fara upp úr skotgröfunum þegar kemur að umræðu um aðild að ESB og viðræðurnar.
Meðal annars kom sú spurning upp hvers vegna í drögum að ályktum um Evrópumál sem liggur fyrir landsfundinum væri ekki að finna staf um að Sjálfstæðisflokkurinn vilji slíta viðræðunum. Bjarni benti á að þetta hefði verið niðurstaða nefndar en geti vissulega tekið breytingum í meðförum fundarins.
Þegar kom að Reykjavíkurflugvelli voru þau einnig á sama máli, hann eigi að vera í Reykjavík. Ragnheiður Elín tók þó fram að ef Reykvíkingar vilji ekki flugvöllinn séu Keflvíkingar tilbúnir að taka við innanlandsfluginu.
Og Bjarni fékk að svara fyrir landakaup útlendinga. Hann sagði það hafa verið stóra ákvörðun fyrir litla þjóð þegar heimildin tók gildi um að allir innan EES hafi heimild til að kaupa hér jarðir. Hann sagðist vissulega vilja sjá þá uppbyggingu sem boðuð hefur verið á Grímsstöðum en að hann hafi þó efasemdir um söluna. Bjarni vill heildarendurskoðun á regluverkinu því útlit sé fyrir aukinni ásókn í íslenskar jarðir frá Asíu. Því megi ekki setja fordæmi sem geti komið í bakið á okkur síðar. Þá sé fráleitt að ákvörðunin fari eftir geðþótta einstaka ráðherra.
