Þorláksbúð eins og hún kemur til með að líta út eftir endurbyggingu.

Húsafriðunarnefnd og mennta- og menningarmálaráðuneytið greinir á um með hvaða hætti eigi að túlka lög um húsafriðun. Nefndin tók þá ákvörðun fyrr í þessum mánuði að skyndifriða Skálholtskirkju, Skálholtsskóla og nánasta umhverfi og koma þannig í veg fyrir að svonefnd Þorláksbúð yrði reist á rústum sem fundist hafa rétt við kirkjuna.

Katrín Jakobsdóttir, mennta- og menningarmálaráðherra, sagði í samtali við Morgunblaðið í gær að húsafriðunarnefnd hefði tveggja vikna frest til þess að leggja fram formlega tillögu til ráðherra um að umræddar byggingar verði friðaðar. Hún tæki síðan ákvörðun um það hvort hún samþykkti þá tillögu eftir að fresturinn rennur út. „Þannig að ég hef í raun ekkert til að taka ákvörðun um fyrr en þá,“ sagði Katrín, en hún heimsótti Skálholt í gær til þess að kynna sér aðstæður á staðnum.

Nikulás Úlfar Másson, arkitekt og formaður húsafriðunarnefndar, lítur nokkuð öðruvísi á málið. „Þetta er einhver túlkun sem við höfum aldrei heyrt áður í rauninni,“ segir hann meðal annars í Morgunblaðinu í dag.