Hnetutoppar eru á meðal þess sem hefur verið innkallað.

Emmessís hefur í samráði við matvælaeftirlit Heilbrigðiseftirlits Reykjavíkur ákveðið að innkalla af markaði nokkrar vörur þar sem ofnæmis- og óþolsvaldur er ekki merktur á umbúðum þeirra

Um er að ræða Hnetutoppa (askja með 4 og 6 toppum), Daimtoppar (askja með 4 toppum), Jólaíspinnar með vanillubragði (askja með 12 íspinnum), Ísbjörn – vanillustangir með súkkulaðihjúp (askja með 10 stöngum) og Skoppa og Skrítla (askja með 10 stöngum).

„Ekki kemur fram í innihaldslýsingu á umbúðum matvælanna að þau innihalda sojalesitín. Soja og afurðir úr því eru á lista yfir ofnæmis- og óþolsvalda. Samkvæmt matvælalöggjöfinni eiga ofnæmis- og óþolsvaldar að vera skýrt merktir í merkingum matvæla. Tekið skal fram að innköllunin á einungis við vörur þar sem ofnæmis- og óþolsvaldurinn er ómerktur.

Vörurnar eru skaðlausar fyrir þá sem ekki eru viðkvæmir fyrir soja eða afurðum úr því. Þeir neytendur, sem eiga umræddar vörur og eru viðkvæmir soja og sojaafurðum, eru beðnir um að farga þeim eða skila til Emmessíss ehf., Bitruhálsi 1, 110 Reykjavík, eða Emmessíss ehf., Njarðarnesi 10, 603 Akureyri,“ segir í tilkynningu frá matvælaeftirliti Heilbrigðiseftirlits Reykjavíkur.