Leikskólar í Reykjavík Árni Sæberg

Rökstuðningur meirihluta borgarstjórnar fyrir því að afnema greiðslu vegna yfirvinnustunda í neysluhléi leikskólakennara í skrefum er ótrúverðugur að sögn Sóleyjar Tómasdóttur, borgarfulltrúa VG. Var samþykkt á fundi borgarráðs í morgun að afnema þessar greiðslur.

Í yfirlýsingu Sóleyjar kemur fram að greiðslur fyrir matarhlé hafa verið inntar af hendi frá því 2007 þótt önnur sveitarfélög í landinu hafi fellt þær niður. Fulltrúar allra flokka í Reykjavík hafi staðið um þær vörð gegnum erfitt tímabil og rökstutt með sanngirnissjónarmiðum.

Því veki viðsnúningur í afstöðu meirihlutans nú furðu og tilraun hans til að rökstyðja ákvörðun sína er ótrúverðug, sér í lagi þar sem versti hjallinn í kjölfar efnahagshrunsins sé yfirstaðinn. Rökstuðningur meirihlutans byggi á því að leikskólakennarar hafi náð fram meiri hækkunum en aðrar stéttir í gegnum kjarasamninga og því sé eðlilegt að fella niður „yfirborganir“ sem Reykjavík hafi stundað en ekki önnur sveitarfélög.

Þá nái ákvörðun meirihlutans aðeins til leikskólakennara, sem eru um 30% starfsfólks á leikskólum. Aðrir starfsmenn fái áfram greitt fyrir vinnu sína í matartímum leikskólanna. Segir Sóley að grunnskólakennarar fái greitt fyrir að matast með nemendum, stéttin sem leikskólakennarar beri sig saman við. Matartímar leikskólanna séu hluti af daglegu starfi sem geta ekki farið fram án leikskólakennara. Fyrir þá vinnu eigi að greiða.