Árni Þór Sigurðsson alþingismaður. mbl.is/Ómar Óskarsson

Árni Þór Sigurðsson, þingmaður VG, segir að Ögmundur Jónasson innanríkisráðherra hafi komist að réttri niðurstöðu þegar hann hafnaði umsókn Huang Nubo. Hann vill þó að kannað verði áfram hvort ekki sé hægt að stuðla að uppbyggingu ferðaþjónustu á svæðinu þó ekki verði að jarðakaupunum.

„Sú ákvörðun Ögmundar Jónssonar innanríkisráðherra að hafna umsókn Kínverjans Nubo um að kaupa jörðina Grímsstaði á Fjöllum hefur vakið mikil viðbrögð víða í samfélaginu. Sumir gagnrýna hana harðlega, aðrir hafa lýst stuðningi við hana. Niðurstaðan sem innanríkisráðherra komst að er rétt og enginn ráðherra í ríkisstjórn Íslands hefði getað komist að annarri niðurstöðu öðruvísi en að fara á svig við gildandi íslensk lög. Enginn ráðherra getur valið sér niðurstöðu við afgreiðslu mála sem grunda þarf á skýrum lagafyrirmælum. Það ættu þeir að hafa í huga sem gagnrýna ráðherrann hvað harðast, jafnvel úr návígi. Það breytist ekki með háværum upphrópunum og stóryrðum.

Samkvæmt íslenskum lögum er erlendum ríkisborgurum utan EES svæðisins óheimilt að fjárfesta í landi hérlendis. Það er hin almenna regla laganna. Undanþáguheimildin sem löggjafinn hefur veitt verður að skoðast í þessu samhengi og því að það séu ríkir almannahagsmunir að veita undanþágu. Sala á gríðarlegu landsvæði á hálendi Íslands, sem margir hverjir telja dýrmæta auðlind, getur ekki talist til slíkra almannahagsmuna, þvert á móti eru það ríkir almannahagsmunir að landauðlindin sé í eigu opinberra aðila.

En þýðir þessi ákvörðun að við séum með einhverju móti komin á endastöð? Því fer víðs fjarri. Vitaskuld sjá allir sem það vilja sjá, að það þarf ekki að kaupa 0,3% af heildarflatarmáli landsins til að setja á laggirnar hótel og ferðaþjónustufyrirtæki sem færir sér á sjálfbæran hátt í nyt þau eftirsóknarverðu gæði sem óspillt víðerni landsins bjóða upp á. Við erum nú stödd í þessu máli þar sem við erum. Nú væri nær að kanna til hlítar hvort ekki sé unnt að hvetja til og stuðla að uppbyggingu í ferðaþjónustu á svæðinu eins og óskað hefur verið eftir innan þess lagaumhverfis sem í gildi er og í samræmi við þær réttarheimildir sem löggjafinn hefur veitt og framkvæmdavaldið er bundið af,“ segir Árni Þór á heimasíðu sinni.