Síðasti dagur rjúpnaveiði er í dag, en veiðidögum var fækkað úr 18 í 9 í ár vegna afkomubrests í stofninum.
Sölubann er á rjúpu og öllum rjúpnaafurðum eins og undanfarin ár. Um 550 skotveiðimenn höfðu pantað veiðikort hjá Umhverfisstofnun þegar veiðitímabilið hófst sem er talsvert minna en á sama tíma í fyrra. Talið er að 5-6 þúsund skotveiðimenn gangi til rjúpna á hverju ári.
Rjúpnaskyttur eru hvattar til að sýna hófsemi við veiðarnar. Veiðiþol rjúpunnar er 31.000 fuglar samkvæmt mati Náttúrufræðistofnunar.