Jarðskjálftar hafa orðið sem talið er að rekja megi til niðurdælingar á vatni frá Hellisheiðarvirkjunar. mbl.is/Golli

Það er Orkuveitu Reykjavíkur að bæta hugsanlegt tjón sem verður á mannvirkjum vegna jarðskjálfta sem rekja má til niðurdælingar á vatni. Bætur fara eftir skaðabótalögum sem þýðir að sanna verður að tjónið megi rekja til niðurdælingar.

Þetta sagði Árni Páll Árnason, efnahags- og viðskiptaráðherra, í svari við fyrirspurn frá Björgvini G. Sigurðssyni, alþingismanni Samfylkingarinnar. Hann sagði það grunnreglu að sá sem veldur tjóni bæti tjónið.

Björgvin og aðrir þingmenn sem tjáðu sig í umræðunni lýstu yfir áhyggjum af því að fólk sem yrði fyrir tjóni vegna jarðskjálfta sem orsakast af niðurdælingu orkufyrirtækjanna þyrfti að leita til dómstóla til að sanna að niðurdælingin hafi valdið tjóni. Málið sé þá áfram í óvissu.

Árni Páll sagði ekki ganga að láta Viðlagatryggingu bera hugsanlegt tjón af niðurdælingu vegna þess að ekki væri hægt að tryggja sig gegn slíku tjóni. Það væri þá frekar að breyta lögum um Bjargráðasjóð, en hann sagði þó aðalatriði að orkufyrirtækin bættu það tjón sem starfsemi þeirra leiddi af sér.