Björn Óli Hauksson forstjóri Isavia og Hörður Már Harðarson formaður Slysavarnafélagsins Landsbjargar handsala samning félaganna um styrktarverkefni Isavia.

Isavia ohf. hefur stofnað sjóð til að styðja björgunarsveitir Slysavarnafélagsins Landsbjargar. Fram kemur í tilkynningu að tilgangur sjóðsins sé að efla hópslysaviðbúnað björgunarsveita félagsins með sérstaka áherslu á hlutverk björgunarsveita í viðbúnaðaráætlunum áætlunarflugvalla.

Segir að það sé markmið verkefnisins að björgunarsveitir, og þar með viðbúnaðarkerfi landsins, séu ávallt sem best búnar til þess að takast á við hópslys.

„Verkefnið er til þriggja ára og ráðgerir Isavia að styrkja björgunarsveitir SL  um 5 milljónir króna árið 2011 og 8 milljónir árið 2012 og 2013, samtals um 21 milljón króna.

Stjórn sjóðsins er skipuð tveimur fulltrúum frá Slysavarnafélaginu Landsbjörg og tveimur frá Isavia sem móta munu nánara fyrirkomulag og forsendur úthlutunar, meta umsóknir og gera tillögu um úthlutun til forstjóra Isavia.

Allar björgunarsveitir Slysavarnafélagsins Landsbjargar geta sótt um framlag úr sjóðnum.  Gert er ráð fyrir því að um 70% fjárins verði varið til björgunarsveita sem gegna hlutverki í flugslysaáætlunum við áætlunarflugvelli landsins og 30% til annarra björgunarsveita. „Forsendur úthlutunar eru að fénu sé varið til þess að efla viðbúnað vegna hópslysa, t.d. til menntunar, búnaðar-  eða tækjakaupa.  Í sérstökum tilfellum er heimilt að styrkja önnur verkefni en vegna hópslysaviðbúnaðar en ekki er miðað við að fénu sé varið til almenns reksturs,“ segir í tilkynningu.

Verkefninu var hrint af stað með undirritun samkomulagsins um stofnun sjóðsins á fulltrúaráðsfundi SL sem haldinn var í Háskólanum í Reykjavík sl. laugardag,  26. nóvember 2011.

Þá fór fram styrkúthlutun til Björgunarsveitarinnar Suðurnes í Reykjanesbæ (800.000 kr.) og Björgunarskóla Slysavarnafélagsins Landsbjargar (600.000).