Á myndinni má sjá Jónu Bertu Jónsdóttur og Björgu Hansen, fulltrúa Mæðrastyrksnefndar, ásamt nokkrum fulltrúum félaganna sjö sem færðu nefndinni gjöfina.

Sjö verkalýðsfélög í Eyjafirði afhentu Mæðrastyrksnefnd Akureyrar styrk að upphæð kr. 1.770.000 sl. föstudag. Jóna Berta Jónsdóttir veitti styrknum viðtöku fyrir hönd Mæðrastyrksnefndarinnar.

Félögin sjö sem færðu nefndinni styrk eru Eining-Iðja, Fagfélagið, Félag málmiðnaðarmanna Akureyri, Félag verslunar- og skrifstofufólks Akureyri og nágrennis, Sjómannafélag Eyjafjarðar, Sjómannafélag Ólafsfjarðar og Verkstjórafélag Akureyrar og nágrennis.

Í tilkynningu, sem félögin sendu, segir að Jóna Berta hafi þakkað fyrir stuðninginn og sagt að þetta kæmi að góðum notum. Hún sagði einnig að þeir sem þurfi á aðstoð að halda þyrftu að koma í húsnæði Mæðrastyrksnefndar dagana 8. til 10. desember nk. milli kl. 13 og 17 og skrá sig. Þeir sem ekki geta mætt á svæðið geta hringt í síma 868 3143 eða 460 4617 á sama tíma.

Afhending fer svo fram dagana 16. til 19. desember í Íþróttahöllinni á Akureyri þar sem Mæðrastyrksnefnd er til húsa. Gengið inn að vestan frá Þórunnarstræti. Það er alltaf opið á þriðjudögum frá kl. 13.00 til 18.00 og þá daga sem úthlutun fer fram verður opið á sama tíma.

Vakin er athygli á því að Mæðrastyrksnefnd Akureyrar aðstoðar fólk um allan Eyjafjörð, frá Siglufirði að Grenivík, og starfar allan ársins hring þótt mestu annirnar séu nú eins og jafnan áður í kringum jólahátíðina.