Herjólfur kemur inn í Landeyjahöfn. mbl.is/GSH

Hægt er að fá dælubúnað sem getur dælt sandi úr Landeyjahöfn fyrir 250-300 milljónir. Þennan búnað þarf að setja upp sem allra fyrst. Þetta sagði Árni Johnsen alþingismaður á Alþingi í dag.

Árni sagði að því hefði verið haldið fram að þessi búnaður kostaði milljarð, en það væri ekki rétt. Hann sagði að búnaður af þessu tagi gæti dælt sandi úr höfninni og skilað honum 600 metra frá landi. Hann sagði auk þess þörf á að fá nýja ferju til að sigla milli lands og Eyja, en það gæti tekið tvö ár.

Eygló Harðardóttir alþingismaður sagði að vissulega væri þörf á að fá ferju, en það þyrfti líka að eiga við sandburðinn. Breiðafjarðarferjan Baldur hefði tekið niðri í höfninni í haust þrátt fyrir að rista mun grynnra en Herjólfur.

Eygló sagði að menn hefðu fengið ónýtt dæluskip til landsins. Það hefði legið heilu dagana bilað í höfn þó að hægt hefði verið að vinna að sanddælingu. Hún gagnrýndi að tekið hefði verið tilboði í sanddælingu án þess að gætt hefði verið nægilega vel að því að verktakinn væri með búnað sem stæðist kröfur.

Ögmundur Jónasson innanríkisráðherra sagði að Vegagerðin væri að kanna leiðir til að fá ferju til landsins og í því sambandi væri bæði horft til skammtímalausnar og lausnar til lengri tíma. Hann hefði í morgun átt fund með starfshópi sem ynni að þessu máli.